Սա մեծ իրադարձություն է մեր երկրի կյանքում. Նիկոլ Փաշինյանը ՝ Մ20 տարեկանների ֆուտբոլի աշխարհի առաջնությունը Հայաստանում և Վրաստանում հյուրընկալելու մասին
Ուզում եմ ուրախությամբ արձանագրել, որ ՖԻՖԱ-ն շատ կարևոր մի որոշում է կայացրել, 2029 թվականին աշխարհի՝ մինչև 20 տարեկանների ֆուտբոլի առաջնությունը տեղի կունենա Հայաստանում և Վրաստանում: Այդ մասին Կառավարության՝ ապրիլի 30-ի նիստին ասաց վարչապետ Նիկոլ Փաշինյանը:
«Ուզում եմ թե՛ Վրաստանին, թե՛ մեզ շնորհավորել այս հաջողության առիթով: Ուզում եմ նաև շնորհակալություն հայտնել Վրաստանի մեր գործընկերներին և անձամբ վարչապետ Կոբախիձեին այս հարցում արդյունավետ և սերտ գործակցության համար:
Կարծում եմ՝ ակնհայտ է, որ սա մեծ իրադարձություն է մեր երկրի կյանքում՝ և՛ ֆուտբոլային, և՛ բոլոր առումներով:
Հիմա անցանք գործի: Նախ պետք է աշխատանքային խումբ, կազմկոմիտե ձևավորենք՝ փոխվարչապետ Տիգրան Խաչատրյանի գլխավորությամբ »,- ասաց նա՝ միաժամանակ ընդգծելով, որ ՖԻՖԱ-ի և վրաց գործընկերների հետ համատեղ պետք է քննարկել նաև կազմկոմիտե ստեղծելու անհրաժեշտության հարցը:
«Ուզում եմ շնորհակալություն հայտնել երկու երկրների ֆեդերացիաներին, որոնք այս ընթացքում շատ սերտ աշխատել են, ջանքեր են գործադրել, որպեսզի այս իրադարձությունը տեղի ունենա:
Ես հիշում եմ, երբ տարիներ առաջ ֆեդերացիաները մոտեցան մեզ՝ ինձ և Վրաստանի վարչապետին, և այդ գաղափարն առաջ քաշեցին: Բնականաբար, դա մեզ շատ ուրախացրեց, բայց, մյուս կողմից, դժվարանում էինք գնահատել, թե ինչքանով է իրատեսական: Հիմա փաստը մնում է փաստ»,- ասաց նա:
ԿԳՄՍ նախարար Ժաննա Անդրեասյանն արձագանքեց՝ շատ մեծ իրադարձություն է, այն մեծահասակների աշխարհի առաջնությունից հետո իր նշանակությամբ երկրորդ կարևորագուն միջոցառումն է, ոչ ֆորմալ առումով այն նաև աշխարհի երիտասարդական առաջնություն է անվանվում: Ակնկալվում է, որ այդ օրերին ՀՀ կայցելի ավելի քան 100 հազար երկրպագու՝ թիմերի խաղերը դիտելու:
«Այս պահին դեռևս ծրագիրը նախնական է, հնարավոր է՝ որոշ փոփոխությունների ենթարկվի, բայց մենք պլանավորում ենք, որ Երևանում կունենանք մինչև 20 խաղ, և՛ Վանաձորում, և՛ Իջևանում միասին՝ մինչև 10 խաղ»,- ասաց նախարարը՝ տեղեկացնելով, որ խոսքը 2029 թվականի սեպտեմբեր-հոկտեմբեր ամիսների մասին է:
Փաշինյանը նկատեց՝ Կառավարությունը կպատրաստվի, բայց պետք է մասնավոր ոլորտն էլ պատրաստվի, քանի որ խոսքը 100 հազար այցելուի մասին է: Նաև ճանապարհային ենթակառուցվածքները պետք է պատշաճ վիճակում լինեն: Ինչ վերաբերում է սննդի ոլորտին, Փաշինյանն իր մտահոգությունը հայտեց՝ կատակելով. «Եթե այդքան մարդ մտնի, ասենք, Իջևան, մի օրում սնունդը կարող է վերջանալ»:
