Կրթության ոլորտում աշխատողների մեծ մասը կանայք են, և դա պատահական չէ․ Տիգրան Ավինյան
Երևանի քաղաքապետ Տիգրան Ավինյանը գրել է․
«Հարգելի՛ տնօրեններ, սիրելի՛ ուսուցիչներ և նախադպրոցական կրթության ոլորտի հարգելի՛ ներկայացուցիչներ, սրտանց շնորհավորում եմ ձեզ մայրության և գեղեցկության տոնի առթիվ։ Կրթության, հատկապես նախադպրոցական ոլորտում աշխատողների մեծ մասը կանայք են, և դա պատահական չէ․ այս աշխատանքը պահանջում է ոչ միայն մասնագիտական գիտելիք, այլև համբերություն, ուշադրություն և ամենօրյա հոգատարություն մեր երեխաների նկատմամբ։
Մենք այսօր մեծ ուշադրություն ենք դարձնում կրթական միջավայրի բարելավմանը։ Մանկապարտեզների մասով սա մեր ուղիղ պատասխանատվությունն ու առաջնահերթությունն է: Այսօր Երևանի մանկապարտեզների և դպրոցների տնօրենների հետ «Սասունցի Դավիթ» բալետ-օրատորիայի ներկայացմանն էինք: Կարևոր եմ համարում, որ նման բովանդակությունը հասանելի լինի երեխաներին նաև մշակույթի միջոցով՝ ոչ միայն դասագրքերում, այլև կենդանի ներկայացումների միջոցով։ Շնորհակալություն ձեր նվիրված աշխատանքի համար»։
