Ասում եք՝ արժեքների բախում է այսօր մեր երկրում: Այո՛, այսօր մեր երկրում արժեքների բախում է: Մի կողմում այն արժեքն է, որտեղ պետության ղեկավարը դուրս է գալիս փողոց և ուղիղ եթերով շփվում է իր քաղաքացիների հետ, բանավիճում է իր քաղաքացիների հետ, հետո անգամ ներողություն է խնդրում քաղաքացուց, մյուս կողմում այն արժեքն է, որտեղ ղեկավարի անունը կրճատելու համար տանում են, զուգարանում այնքան են ծեծում, որ մարդը զուգարանում մահանում է: Հիմա պետք է որոշեք՝ այդ արժեքների ո՞ր կողմում եք: Այդ մասին Ազգային ժողովի հայտարարության ժամին ասաց «Քաղաքացիական պայմանագիր» խմբակցության ղեկավար Հայկ Կոնջորյանը:
Իշխող ուժի ներկայացուցիչն իր ելույթի ժամանակ անդրադարձավ նաև վարչապետ Նիկոլ Փաշինյանի այն հայտարարության մասով քննարկումներին, ըստ որի՝ եթե «Քաղաքացիական պայմանագիրն» առաջիկա խորհրդարանական ընտրություններին չստանա սահմանադրական մեծամասնություն, ապա սեպտեմբերին պատերազմ կլինի:
«Այո՛, ասում ենք, որ եթե «Քաղաքացիական պայմանագիրը» եկող ընտրություններում չունենա սահմանադրական մեծամասնություն, ապա ամենայն հավանականությամբ և վստահաբար լինելու է աղետաբեր պատերազմ:
Ինչո՞ւ ենք ասում, որովհետև այսօր ընդդիմությունը փաստացիորեն իր վրա է վերցրել պատերազմի հրձիգի պարտավորությունը: Ռոբերտ Քոչարյանը մաքուր պատերազմի հրձիգ է, Ռոբերտ Քոչարյանի ուժը պատերազմի հրձիգ է, Դաշնակցությունը, ընդդիմությունը դեմ են սահմանազատման գործընթացին:
Դո՞ւք չէիք, որ սահմանազատման գործընթացը փորձում էիք վիժեցնել: Դո՞ւք չէիք, որ ասում էիք՝ Կիրանցով դեպի Ղարաբաղ: Դո՞ւք չէիք, որ ամբողջությամբ խաղաղության գործընթացն ուզում էիք տորպեդահարել: Պարզ չէ՞, որ երբ եկաք իշխանության, խաղաղության ամբողջ ճարտարապետությունը փլվելու է»,- ասաց նա:
