Աշխարհը գիտի, որ Թրամփին պետք է լուրջ ընդունել. Բրյուս

Ես չեմ պատրաստվում ենթադրություններ անել այն մասին, թե ինչ կարող ենք կամ չենք կարող անել որոշ գործողությունների հետ կապված։ Աշխարհը գիտի, որ պետք է նախագահ Թրամփին լուրջ ընդունել։ Այս պայմանավորվածությունը, այս գործարքը, նրա համար կարևոր է։ Այս մասին հայտարարել է ԱՄՆ Պետդեպարտամենտի պաշտոնական ներկայացուցիչ Թեմի Բրյուսը, պատասխանելով լրագրողների հարցերին։
«Նրանք Սպիտակ տանն էին։ Սա կարևոր է այս վարչակազմի համար։ Կարևոր է աշխարհի համար։ Կարող եմ ասել, որ, որքան էլ որոշ մարդիկ գուցե չգիտեն, քանի որ դա չի լուսաբանվում, այս երկու հարևանները տասնամյակներ շարունակ հակամարտության մեջ են։
Կարծում եմ՝ արդեն ավելի քան 35 տարի է, և անհաշվելի կյանքեր են կորցվել, սերունդներ են տուժել։ Թեպետ շատերը փորձել են՝ պետք է նշել և՛ եվրոպացիներին, և՛ ֆրանսիացիներին, և՛ Պուտինին, և՛ անգամ Բայդենին, բայց միայն նախագահ Թրամփն է կարողացել հաջողությամբ բերել այս երկու երկրներին համաձայնության՝ այս պատմական խաղաղության շուրջ։
Կարծում եմ՝ աշխարհը գիտի, որ նա հավատարիմ է երկարաժամկետ, կայուն խաղաղությանը երկրների միջև՝ անկախ նրանից, թե որքան է տևել հակամարտությունը կամ թշնամանքը։
Եվ այդ հանձնառությունը, ինչպես մենք նույնպես տեսել ենք, հիմնված է դիվանագիտության վրա։ Նա իրատես է, բայց կանի այն, ինչ անհրաժեշտ է՝ առավելագույնս օգտվելու ԱՄՆ նախագահի կարգավիճակից պատերազմները դադարեցնելու համար»,- ասել է Թեմի Բրյուսը։
Հիշեցնենք, օգոստոսի 7-8-ը Հայաստանի Հանրապետության վարչապետ Նիկոլ Փաշինյանն այցելեց Ամերիկայի Միացյալ Նահանգներ։ Այս մասին հայտնել են Կառավարությունից:
Վաշինգտոնում վարչապետ Փաշինյանը երկկողմ հանդիպում ունեցավ Ամերիկայի Միացյալ Նահանգների նախագահ Դոնալդ Ջ. Թրամփի հետ՝ Հայաստան-ԱՄՆ ռազմավարական գործընկերությունը խորացնելու նպատակով, ինչպես նաև եռակողմ հանդիպում՝ ԱՄՆ նախագահ Դոնալդ Ջ. Թրամփի և Ադրբեջանի նախագահ Իլհամ Ալիևի հետ՝ միտված տարածաշրջանում խաղաղության, բարօրության և տնտեսական համագործակցության առաջմղմանը։