Պատմական իրադարձություն Երևանում. ՈՒԵՖԱ-ն առաջին անգամ Հայաստանը դարձրեց եվրոպական ֆուտբոլային բժշկության կենտրոն
Եվրոպական ֆուտբոլում բժշկական չափանիշների բարելավմանն ուղղված մեր հանձնառությունը նախորդ շաբաթ կատարեց պատմական քայլ։ Առաջին անգամ Հայաստանի մայրաքաղաք Երևանում անցկացվեց Ֆուտբոլային բժիշկների կրթական ծրագրի (FDEP) ինտենսիվ դասընթացը, որը համախմբեց բժիշկների ողջ Եվրոպայից:
Այս իրադարձությունը դարձավ համագործակցության, փորձի փոխանակման և խաղացողների առողջության պահպանմանն ուղղված համաեվրոպական շարժման խորհրդանիշ՝ ցույց տալով, թե ինչպես է ժամանակակից ֆուտբոլային բժշկությունը շարունակում զարգանալ կրթության միջոցով:
ՈՒԵՖԱ-ի գլխավոր բժշկական տնօրեն Զորան Բահտիյարևիչը բարձր գնահատեց թե՛ ծրագրի ազդեցությունը, և թե՛ Հայաստանի ֆուտբոլի ֆեդերացիայի (ՀՖՖ) դերը՝ որպես հյուրընկալող կողմ.
«Նման միջոցառումները փաստում են, թե ինչպես կրթությունը և միասնական չափանիշները կարող են ուղղակիորեն բարելավել խաղացողների անվտանգությունը ողջ Եվրոպայում», - ասաց Բահտիյարևիչը: «Մենք իսկապես տպավորված ենք Երևանում կազմակերպչական մակարդակով և հյուրընկալությամբ: Հայաստանը ստեղծել է հիանալի միջավայր ուսուցման համար, և այս ծրագիրը կունենա տևական ազդեցություն»:
FDEP միջոցառումը հյուրընկալել էր բժիշկների ՈՒԵՖԱ-ի անդամ բոլոր 55 ազգային ֆեդերացիաներից: Ծրագիրը ներառում էր գործնական սեմինարներ և կլինիկական պարապմունքներ՝ նվիրված էլիտար ֆուտբոլում ամենատարածված վնասվածքների ախտորոշմանը և բուժմանը:
Նպատակը հստակ էր. կատարելագործել խաղադաշտում արագ որոշումների կայացումը և ապահովել խաղացողների անվտանգ վերադարձը սպորտ: Ծրագրի առանցքային թեման «Սովորեցրու սովորեցնողին» (Teach the Teacher) մոտեցումն է, ինչը երաշխավորում է, որ Երևանում ստացած գիտելիքները կփոխանցվեն յուրաքանչյուր երկրի բժշկական թիմերին:
ՀՖՖ-ի համար այս միջոցառման հյուրընկալումը կարևոր հանգրվան էր երկրի սպորտային բժշկության պատմության մեջ: Միջոցառմանը ներկա էր նաև ՀՀ առողջապահության նախարար Անահիտ Ավանեսյանը:
«Մեզ համար մեծ պատիվ է ձեզ հյուրընկալել Երևանում», - նշեց ՀՖՖ նախագահ Արմեն Մելիքբեկյանը: «Այս միջոցառումը ամուր հիմքեր է ստեղծում, և հուսով եմ՝ սա վերջին անգամը չէ, որ դուք այցելում եք մեր երկիր»:
ՀՖՖ բժշկական դեպարտամենտի ղեկավար Նարեկ Վանեսյանի համար այս շաբաթը երկարաժամկետ տեսլականի իրականացումն էր. «Սա շրջադարձային իրադարձություն է հայկական ֆուտբոլային բժշկության համար: Մենք դիմել էինք այս ծրագիրը հյուրընկալելու համար դեռ երկու տարի առաջ, և տեսնել, թե ինչպես է այն իրականություն դառնում, չափազանց ոգևորիչ է»:
Ծրագրի ավարտին մասնակիցները հեռացան հստակ ռազմավարություններով՝ իրենց ֆեդերացիաներում բժշկական կառույցներն ամրապնդելու համար՝ օգտագործելով ՈՒԵՖԱ-ի HatTrick բժշկական ֆինանսավորումը:
