«ՀԷՑ»-ի և «Տեքս» ՓԲԸ-ի միջև կնքված վարձակալության պայմանագիրը դադարեցվել է
«Հայաստանի էլեկտրական ցանցեր» ՓԲ ընկերությունը տեղեկացնում է, որ դադարել է ՀԷՑ ՓԲ և «Տեքս» ՓԲ ընկերությունների միջև 01.03.2021 թվականին կնքված վարձակալության պայմանագիրը, որի շրջանակում վարձատուն պարտավորված է եղել վճարի դիմաց վարձակալի օգտագործմանը և տիրապետմանը հանձնել Հայաստանի Հանրապետության ամբողջ տարածքում գտնվող իրեն սեփականության իրավունքով պատկանող էլեկտրասյուները։ Այս մասին հայտնում է «Հայաստանի էլեկտրական ցանցեր» ընկերությունը։
«Համաձայն պայմանագրով սահմանված կարգավորումների՝ 2026-ի հունվարի 1-ից պայմանագրի դադարեցումից հետո կնքված ծառայությունների մատուցման պայմանագրով «Տեքս» ՓԲԸ-ի՝ որպես կատարողի իրավունքներն ու պարտականություններն ինքնին պայմանագրի դադարման ուժով փոխանցվում են ընկերությանը:
Հաշվի առնելով վերոգրյալը՝ հայտնում ենք բոլոր շահագրգիռ անձանց և կազմակերպություններին, որ ընկերության էլեկտրասյուներով օպտիկամանրաթելային մալուխների անցկացման և սարքավորումների տեղադրման ծառայությունների վճարովի մատուցման պայմանագրերի գործողության շարունակման նպատակով անհրաժեշտ է «Հայաստանի էլեկտրական ցանցեր» ՓԲ ընկերության հետ կնքել պայմանագրեր: Ուստի, բոլոր այն անձանց կամ կազմակերպություններին, որոնք իրենց գործունեության ընթացքում ունեին «Տեքս» ՓԲԸ-ի հետ կնքված օպտիկամանրաթելային մալուխների անցկացման և սարքավորումների տեղադրման ծառայությունների պայմանագրեր՝ առաջարկում ենք մինչև հունվարի 31-ը կապ հաստատել «Հայաստանի էլեկտրական ցանցեր» ՓԲ ընկերության պատասխանատու ստորաբաժանման ներկայացուցչի հետ, նոր պայմանագիր կնքելու նպատակով»,- ասվում է հաղորդագրության մեջ։
