Ռոմանոս Պետրոսյանը՝ նոր բաժանորդների միացման գների հնարավոր վերանայման մասին (տեսանյութ)
Վարչապետ Նիկոլ Փաշինյանի հետ աշխատանքային հանդիպման ժամանակ ՀԷՑ ՓԲԸ ժամանակավոր կառավարիչ Ռոմանոս Պետրոսյանն անդրադարձավ բաժանորդների միացման գների հնարավոր վերանայման մասին:
Նիկոլ Փաշինյանը նախ հիշեցրեց, որ բաժանորդների միացման գների փոփոխություներ էին տեղի ունեցել, և մարդիկ կասկածներ էին հայտնում, թե ինչքանով են հիմնավորված այդ գները, որովհետև միացման գներն էականորեն էին բարձրացել:
ՀԷՑ-ի ժամանակավոր կառավարիչը տեղեկացրեց՝ հարցի վերաբերյալ աշխատանքային քննարկում է եղել:
«Այս պահին որոշակի պատկերացում ունենք, թե մոտ ինչ չափով ենք կարողանալու վերանայել, և լիահույս եմ, որ տարեսկզբից վերանայման որոշումները կկայացվեն»,- ասաց նա:
Նիկոլ Փաշինյանը նկատեց՝ քաղաքական նպատակադրումը չպետք է լինի հաճոյանալու համար այնքան իջեցնել, որ արդյունքում, օրինակ, 3 տարի հետո խնդիր առաջանա:
«Եթե ֆիքսենք, որ իրոք բարձր է, պետք է բերենք «գիծ՝ պլյուս պայմանական մի լումա», որ 1 լուման ներդրվի հետագա զարգացման համար»,- ասաց նա:
Ռոմանոս Պետոսյանը մանրամասնեց՝ վերանայման հարցով հաշվարկներ այս պահին արդեն իսկ կան. «Առնվազն գոնե 30-40 տոկոսով հնարավոր է վերանայում ունենանք»:
