Եթե իսկապես գործարան եք ուզում կառուցել՝ կառուցեք։ Ո՞վ է խանգարում։ Գործարան կառուցելու համար իշխանության գալ պետք չէ. Գալջյան
Երևանի ավագանու անդամ Արմեն Գալջյանը ֆեյսբուքյան իր էջում անդրադարձել է այն հայտարարություններին, ըստ որոնց՝ նախ պետք է կառուցել գործարաններ, հետո նոր՝ դպրոցներ ու մանկապարտեզներ։
«Ձևականները հայտարարում են, թե պետք է նախ գործարաններ կառուցել, հետո նոր՝ դպրոցներ ու մանկապարտեզներ։ Սակայն ուզում եմ հասկանալ՝ այդքան խոշոր բիզնեսներ ղեկավարող մարդիկ իրո՞ք չգիտեն, որ Խորհրդային միության փլուզումից հետո Հայաստանը անցել է շուկայական տնտեսության։ Այս պայմաններում արտադրությունը ստեղծվում է ոչ թե պետության, այլ մասնավոր հատվածի կողմից, իսկ պետության դերը այլ է․ այն չի զբաղվում բիզնեսով, այլ կարգավորում է օրենսդրական դաշտը՝ ստեղծելով բարենպաստ բիզնես միջավայր, սահմանելով հարկային քաղաքականություն և տրամադրում որոշ արտոնություններ։ Տնտեսագիտության մեջ այս մոտեցումը հայտնի է որպես նեոլիբերալ տնտեսական մոդել:
Այստեղ մի պարզ հարց է ծագում․ Եթե իսկապես գործարան եք ուզում կառուցել՝ կառուցեք։ Ո՞վ է խանգարում։ Գործարան կառուցելու համար իշխանության գալ պետք չէ»:
Նա անդրադարձել է նաև կրկեսի շենքի երկարաձգված կառուցման հարցին՝ նշելով․
«Հետաքրքիր է նաև նրանց բացատրությունը կրկեսի շենքի կառուցման երկարաձգման վերաբերյալ․ ասում են՝ խնդիրը շինարարության մեջ չէր, այլ «ճիշտ բիզնես մոդել» գտնելու։ Փաստորեն, նրանք տասներեք տարի զբաղված են եղել կրկեսի բիզնես մոդելը հաշվարկելով և հաջողել են այն հաշվարկել հենց այն պահին, երբ մտան քաղաքական դաշտ»:
