2018-ից ի վեր Հայաստանում ստեղծվել է ավելի քան 222 հազար աշխատատեղ. Փաշինյան
ՀՀ վարչապետ Նիկոլ Փաշինյանը Կառավարության նիստի ժամանակ ներկայացրեց աշխատատեղերի նոր վիճակագրությունը։
«2025 թվականի սեպտեմբերի դրությամբ առաջին անգամ պատմականորեն Հայաստանում գրանցված և աշխատատեղերով աշխատավարձով ապահովված աշխատատեղերի թիվը հատել է 800 հազարի սահմանը։ Պատմականորեն երբեք մենք նման թիվ չենք ունեցել. սեպտեմբերի դրությամբ այն կազմել է 805687։
Մեր ուշադրությունը հրավիրում եմ այն փաստի վրա, որ նախորդ տարվա սեպտեմբերի համեմատ գրանցված աշխատատեղերը ավելի են 37140-ով կամ 4.8 տոկոսով, իսկ 2018 թվականի սեպտեմբերի համեմատ՝ 222912-ով կամ 38 տոկոսով։
Այսպիսով՝ կարող ենք արձանագրել, որ 2018 թվականից ի վեր Հայաստանում ստեղծվել են ավելի քան 222 հազար աշխատավարձով ապահովված աշխատատեղեր»,- նշեց վարչապետը։
«2018 թվականից հետո մենք Հայաստանում եկամտային հարկը էականորեն իջեցրել ենք։ Եռահարկ եկամտային հարկը, որը 36 տոկոս, 26 տոկոս և 23 տոկոս էր, մենք նախ համահարկ դարձրինք, և հիմա Հայաստանում եկամտային հարկը 20 տոկոս է։ Սա նշանակում է, որ ավել տոկոսները մնացել են մարդկանց մոտ, և մեր բոլոր տնտեսական վերլուծությունները ցույց են տալիս, որ ՀՀ-ում տնտեսությունում փող կա, հետևաբար արդեն աշխատուժի, անհատի, փոքր և միջին բիզնեսի կարողություններից է նաև մեծապես կախված, թե այդ փողի շրջանառությունից ինչ հատված են մարդիկ կարողանում վերցնել։ Այստեղ է աշխատանքի արդյունավետությունը, բիզնեսի կազմակերպման արդյունավետությունը, կրթությունը, անձի կարողությունների շարունակական զարգացումը և այսպես շարունակ, բնականաբար, նաև մեր քաղաքականությունները: Բայց մեր քաղաքականությունները ցույց են տալիս, որ դրանք զարգացմանը նպաստող քաղաքականություն են, հակառակ դեպքում՝ այս զարգացումը որտեղի՞ց, տնտեսական աճը որտեղի՞ց: Ընդ որում՝ ամեն անգամ, երբ Հայաստանում տնտեսական աճը տեղի է ունենում, էլի փորձ է արվում կապել ինչ-որ արտաքին գործոնների հետ, դրանք գալիս-գնում են, տնտեսական աճը մնում է: Նշանակում է՝ այնուամենայնիվ, ինչ-որ ֆունդամենտալ գործոն կա, որ տնտեսական աճի կայունությունը պահում է»,- ասաց Նիկոլ Փաշինյանը։
Էկոնոմիկայի նախարար Գևորգ Պապոյանը նշեց, որ նախորդ տարվա համեմատ ամենաշատ մասնաբաժինն ավելացել է 500 հազարից 2 մլն դրամ աշխատավարձի հատվածում։
«12603 աշխատատեղով ավելացել է. եթե անցյալ տարի եղել է 85072, այս տարի դարձել է 97675, 14.8 տոկոս աճ; 7.6-ով աճել է 2 մլն դրամ և ավելի աշխատավարձ ստացողների թիվը, 8.5 տոկոսով աճել է՝ 150 հազարից 500 հազար։
Եթե անցյալ տարի 500 հազարից 2 մլն ստացողները կազմում էին 11.1 տոկոսը մեր աշխատավարձ ստացողների, այս տարի արդեն՝ 12.1 տոկոսը, այսինքն՝ 500 հազարից 2 մլն աշխատավարձ ստացողների մասնաբաժինն ավելացել է 1 տկոսային կետով, և 2 մլն-ից ավելի ստացողները եթե անցած տարի 1.3 տոկոս էին, այս տարի 1.4 տոկոս են. այսինքն՝ դրական զարգացումներ այստեղ կան»,- ասաց Պապոյանը։
