Իտալիայի դեսպանի գլխավորած պատվիրակությունը քննարկումներ է անցկացրել ՀՀ ԲՏԱ նախարարությունում
ՀՀ բարձր տեխնոլոգիական արդյունաբերության նախարարի առաջին տեղակալ Գևորգ Մանթաշյանը սեպտեմբերի 18-ին ԲՏԱ նախարարության Ռազմարդյունաբերության կոմիտեի նախագահ Արամ Ջիվանյանի հետ ընդունել է ՀՀ-ում Իտալիայի Հանրապետության արտակարգ և լիազոր դեսպան Ալեսսանդրո Ֆերրանտիի գլխավորած պատվիրակությանը։ Այս մասին հայտնում են ԲՏԱ նախարարությունից:
Պատվիրակության կազմում է եղել նաև իտալական «Լեոնարդո» ընկերության Կենտրոնական Ասիայի տարածաշրջանային հարցերով պատասխանատու Կլաուդիո Բալեստրիերին։ Հանդիպման ընթացքում նախարարի առաջին տեղակալը ներկայացրել է նախարարության ռազմավարական ուղղությունները և գործունեության հիմնական ոլորտներն՝ ընդգծելով բարձր տեխնոլոգիաների, տիեզերական սարքաշինության և պաշտպանական համակարգերի զարգացման կարևորությունը։
Իտալիայի դեսպան Ալեսսանդրո Ֆերրանտին, հատուկ անդրադարձ կատարելով «Լեոնարդո» ընկերության գործունեության ուղղություններին, արտադրանքին, նորարարական լուծումներին և տեխնոլոգիական ներուժին, ներկայացրել է Իտալիայի առաջընթացը բարձր տեխնոլոգիական ոլորտում։
Կողմերը քննարկել են բարձր տեխնոլոգիաների ոլորտում համագործակցության հնարավորությունները։
Ամփոփելով քննարկումը՝ երկուստեք ձեռք են բերել պայմանավորվածություններ՝ ուղղված երկկողմ հարաբերությունների զարգացմանն ու փորձի փոխանակմանը։
