Գավառի մանկատունը մեր ուշադրությունը գրավել է չարաշահումների պատճառով. վարչապետ
Տասնյակ անգամներ առիթ եմ ունեցել ասելու, որ դպրոցը, մանկապարտեզը երեխայի համար են, չի կարելի գալ, ասել՝ «կրթության ոլորտի բարեփոխումների հետևանքով իքս թվով տնտեսական աշխատողների աշխատատեղեր փակվում են»: Այդ մասին ԱԺ-ում ասաց ՀՀ վարչապետ Նիկոլ Փաշինյանը՝ պատասխանելով պատգամավոր Արման Ղազարյանի հարցին։
Վարչապետը հիշեցրեց, որ այցելել է «ՍՕՍ» մանկական գյուղ՝ տեսնելու, թե երեխաներն ինչպես են տեղավորվել. ««ՍՕՍ» մանկական գյուղ այցելության ընթացքում համոզվել եմ և նախկին նախարարին էլ հանձնարարական եմ տվել, որ հին մոդելից պետք է րոպե առաջ հրաժարվենք։ Մի քանի օր առաջ նորանշանակ նախարարին եմ զանգահարել և ասել, որ ծերության, խնամքի կենտրոնների վրա եթե մենք միլիարդներ էլ դնենք, շահառուհի հարցը չենք լուծելու, որովհետև արդեն սխալ բանաձև է դրված. այն կենտրոնացված է նրա վրա, թե տնօրենն ինչքան աշխատավարձ պետք է ստանա, մյուսը՝ ինչքան, բայց դրված չէ, ասենք, թե մարդն այդտեղ ինչքանով է իրեն լավ զգում, ինչքանով է լիարժեք կյանքով ապրում»։
Ինչ վերաբերում է Գավառի մանկատանը, Նիկոլ Փաշինյանը նշեց, որ այն իրենց ուշադրությունը գրավել է նաև չարաշահումների պատճառով։ «Նույնիսկ ապօրինի սեփականաշնորհված գույքի խնդիր է եղել, որն իրավապահների ջանքերով վերադարձվել է, և հիմա արդեն պետական գույք է, բայց բոլորը հերթով պետք է այդ մոդելով լուծենք, հույս ունեմ, որ մենք դա օր առաջ կանենք, չնայած ափսոսում եմ, որ շատ արագ դա տեղի չի ունենա»,- ասաց վարչապետը:
Հիշեցնենք՝ գույքը նախկինում պատկանել է Գավառի մանկատան նախկին տնօրենին և ձեռք բերված է եղել օրենքի խախտմամբ. դրա վերաբերյալ կա քրեական վարույթ։ Գլխավոր դատախազ Աննա Վարդապետյանը նշել է, որ ԱՍՀ նախարարության հետ համատեղ աշխատանքի արդյունքում հնարավոր է եղել գույքը վերադարձնել, նորից չափագրել:
