Սաուդյան Արաբիան հայտարարել է Սիրիայի ենթակառուցվածքների վերականգնման նախագծերի մասին

Կիրակի օրը Սաուդյան Արաբիան հայտարարեց Սիրիայի համար նախատեսված հումանիտար նախագծերի մասին, ներառյալ Դամասկոսի շրջակայքում պատերազմի ժամանակներից մնացած փլատակների մաքրման աշխատանքները։ Այս հայտարարությունը հաջորդում է մի քանի միլիարդ դոլարի ներդրումային համաձայնագրերի ստորագրմանը, որոնք ուղղված են երկրի ենթակառուցվածքների վերականգնմանը, հաղորդում է Al Arabiya-ն։

Կիրակնօրյա միջոցառման ժամանակ Դամասկոսում՝ Սալման թագավորի անվան հումանիտար օգնության թագավորական կենտրոնը (KSRelief) ներկայացրեց օգնության փաթեթ, որը ներառում է մայրաքաղաքի և նրա շրջակայքի մաքրման նախագիծ՝ ավելի քան 75 000 խորանարդ մետր փլատակներից։
KSRelief-ի նախագահ Աբդուլլա ալ-Ռաբիան և Սիրիայի արտակարգ իրավիճակների և տարերային աղետների հետևանքների վերացման նախարար Ռաեդ ալ-Սալեհը ստորագրեցին այս նախաձեռնության վերաբերյալ համաձայնագիր, որը ներառում է ոչ պակաս քան 30 000 խորանարդ մետր աղբի հեռացման պլան՝ ավերված տներից և այլ շինություններից։ Սալեհը նշել է, որ փլատակները խոչընդոտում են հումանիտար ջանքերին և վերականգնմանը, իսկ չպայթած «պատերազմի մնացորդները սպառնում են քաղաքացիական բնակչության կյանքին»։

Ըստ կիրակի օրը ստորագրված այլ համաձայնագրերի՝ Էր-Ռիադը կաջակցի Հալեպի, Իդլիբի և Հոմսի նահանգներում 34 դպրոցների վերակառուցմանը, կտրամադրի սարքավորումներ երկրի տարածքում գործող 17 հիվանդանոցների համար, կօգնի վերականգնել մոտ 60 հացի փռեր և կվերականգնի կոյուղու և ջրամատակարարման ենթակառուցվածքները Դամասկոսում։ KSRelief-ի ղեկավար ալ-Ռաբիան նշել է, որ նախագծերը ուղղված են «մի քանի առաջնահերթ խնդիրների լուծմանը, որոնք կապված են հրատապ կարիքների հետ» և «տուժած մարդկանց տառապանքների մեղմացմանը»։

Հուլիսի վերջին Էր-Ռիադը խոստացել էր հատկացնել 6,4 միլիարդ դոլար՝ Սիրիայի հետ ներդրումային և գործընկերային համաձայնագրերի շրջանակում։ Պատերազմը ավերել է Սիրիայի ենթակառուցվածքների մեծ մասը, իսկ ՄԱԿ-ի գնահատմամբ՝ վերականգնման արժեքը գերազանցում է 400 միլիարդ դոլարը։