ԱՄՆ-ն անսպասելիորեն դուրս է բերում զորքերը Իրաքի խոշոր բազաներից
Իրաքի կառավարության բարձրաստիճան պաշտոնյան Kurdistan24-ին հայտնել է, որ ամերիկյան զորքերը սկսել են արագացված կերպով դուրս գալ Իրաքի երկու կարևոր ռազմաբազաներից՝ Աին ալ-Ասադից և Վիկտորիայից, ինչը շեղում է նախկինում համաձայնեցված ժամանակացույցից։ Սկզբնական ծրագրի համաձայն, ամերիկացիները պետք է աստիճանաբար հեռանային մինչև 2025–2026 թթ., սակայն վերջին օրերին Բաղդադին հաղորդվել է, որ երկու բազաներից ամերիկյան ուժերի դուրսբերումը կլինի ավելի շուտ և արագացված։
Աղբյուրը նշել է, որ երկու բազաները, ինչպես սպասվում է, ամբողջությամբ կազատվեն առաջիկա մի քանի օրերի ընթացքում։ Նաև նշվել է, որ դուրս բերված զինվորների մի մասը տեղափոխվել է Քրդստանի մայրաքաղաք Էրբիլ։
Բարձրաստիճան պաշտոնյան ասել է, որ ուժերի դուրսբերումը Իրաքում ամերիկյան ռազմական ներկայությունը նվազեցնելու ավելի լայն ծրագրի մաս է կազմում, սակայն հրաժարվել է տրամադրել հստակ ժամանակացույց կամ լրացուցիչ մանրամասներ։
