Դասերը կվերսկսվեն առկա ձևաչափով վաղվանից՝ մարտի 31-ից․ Հայաստանի ամերիկյան համալսարան
Ինչպես երեկ Հայաստանի ամերիկյան համալսարանի համայնքին ուղղված հաղորդագրության մեջ նշել էր նախագահ Դր․ Բրյուս Պողոսյանը, այսօր (երկուշաբթի) առցանց դասերին անցնելու որոշումը կայացվել էր զգուշավորության նկատառումներից ելնելով՝ առաջնահերթություն տալով համայնքի անվտանգությանը։
«Այսօր ավելի վաղ ՀՀ կրթության, գիտության, մշակույթի և սպորտի նախարարությունից մենք ստացել ենք հավաստիացում, ըստ որի՝ համալսարանին սպառնացող որևէ էական կամ նշանակալի վտանգ առկա չէ, և այն կարող է վերադառնալ բնականոն ուսումնական գործընթացին՝ առկա ձևաչափով։ ՀԱՀ արտակարգ իրավիճակների և ճգնաժամային կառավարման հանձնաժողովի որոշմամբ՝ դասերը կվերսկսվեն առկա ձևաչափով վաղվանից՝ մարտի 31-ից։
Մենք ցանկանում ենք խորին շնորհակալություն հայտնել մեր համայնքի յուրաքանչյուր անդամին՝ այսօր սեղմ ժամկետներում առցանց ուսուցման ձևաչափին արագ և ճկուն կերպով հարմարվելու համար։
Հարգելի՛ ՀԱՀ համայնքի անդամներ, խնդրում ենք շարունակել պարբերաբար ստուգել ձեր էլեկտրոնային փոստերը և վերջին թարմացումների համար հիմնվել բացառապես համալսարանի պաշտոնական հաղորդագրությունների վրա»,-նշվում է ՀԱՀ հայտարարության մեջ։
