Եթե շատ եք ուզում, կարող ենք գրազ էլ գալ, ուղղակի ազնիվ չէ 100-տոկոսանոց ելքով հարցի շուրջ գրազ գալը. Արման Եղոյան
ԱԺ «Քաղաքացիական պայմանագիր» խմբակցության պատգամավոր Արման Եղոյանը «Ֆեյսբուք»-ի իր էջում գրառում է կատարել՝ անդրադառնալով Սամվել Կարապետյանի եղբորորդու՝ Նարեկ Կարապետյանի վերջին հայտարարություններին:
«Նարեկ Կարապետյանն ասում է, որ իրենց ուժը ձայնը տալու է Սամվել Կարապետյանին որպես Հայաստանի վարչապետ և կասկածողի հետ պատրաստ է գրազ գալ, որ դա հենց այդպես է լինելու։
Ցավոք, ես չեմ կարող գրազ գալ, քանի որ ես ոչ թե կասկածում եմ, այլ հաստատ գիտեմ, որ դա այդպես չի լինելու՝ անկախ ընտրության արդյունքներից։ Բանն այն է, որ այս տարվա օգոստոսի 2-ին 9-րդ գումարման Ազգային ժողովի առաջին նիստի մեկնարկից րոպեներ անց Հանրապետության նախագահը պետք է ԱՆՀԱՊԱՂ վարչապետ նշանակի նորընտիր Ազգային ժողովի մեծամասնության ներկայացրած թեկնածուին, և այդ թեկնածուն չի կարող լինել վերջին չորս տարում Հայաստանից բացի այլ պետության քաղաքացիություն ունեցած կամ վերջին չորս տարում Հայաստանում մշտապես չբնակված անձը։
Այսինքն՝ այս տարվա օգոստոսի 2-ին Ազգային ժողովի մեծամասնությունը չի կարող Հանրապետության նախագահին ներկայացնել Սամվել Կարապետյանի, Սնուփ Դոգի կամ Զեմֆիրայի թեկնածությունը, կարող է ներկայացնել Նիկոլ Փաշինյանի, Ռոբերտ Քոչարյանի, Արման Թաթոյանի կամ Էդմոն... մի խոսքով՝ վերջին չորս տարում միայն Հայաստանի քաղաքացի հանդիսացող և վերջին չորս տարում Հայաստանում մշտապես բնակվող մեկի թեկնածությունը։
Եթե շատ եք ուզում, կարող ենք գրազ էլ գալ, ուղղակի ազնիվ չէ 100-տոկոսանոց ելքով հարցի շուրջ գրազ գալը»,- գրել է Եղոյանը:
