Խորհրդարանը քննարկում է Տեղեկատվական համակարգերի կարգավորման հանձնաժողովի անդամի ընտրության հարցը
Խորհրդարանը քննարկում է Տեղեկատվական համակարգերի կարգավորման հանձնաժողովի անդամի ընտրության հարցը:
ՀՀ կառավարությունը Տեղեկատվական համակարգերի կարգավորման հանձնաժողովի անդամի պաշտոնում առաջադրել է Նաիրի Ադամյանի թեկնածությունը:
Տեղեկատվական համակարգերի կարգավորման հանձնաժողովի առաջին կազմի՝ 4 տարի պաշտոնավարման ժամկետով անդամի պաշտոնում առաջադրված Նաիրի Ադամյանի թեկնածությունը ներկայացրեց ԲՏԱ նախարար Մխիթար Հայրապետյանը:
2009-2013 թթ. Նաիրի Ադամյանը սովորել և ավարտել է ԵՊՀ կառավարման ֆակուլտետը՝ ստանալով բակալավրի աստիճան, իսկ 2015-2017 թթ. շարունակել է ուսումը նույն համալսարանում՝ ինովացիաների կառավարման մմասնագիտությամբ ստանալով մագիստրոսի աստիճան:
Ունի ավելի քան 10 տարվա աշխատանքային փորձ:
2024-ի օգոստոսից զբաղեցնում է «Հայփոստ» ՓԲԸ-ի գործադիր տնօրենի տեղակալի պաշտոնը ՏՏ և ֆինանսական ծառայությունների գծով:
Մասնագիտական գործունեության հիմնական ուղղվածությունն է թվային համակարգերի ռազմավարական պլանավորումը, տեխնիկական պրոդուկտների պորտֆելների կառավարումը, ՏՏ կառավարման մոդելների մշակումը, բիզնես գործընթացների քարտեզագրումը և համակարգային ճարտարապետության ձևավորումը, ինչպես նաև միջգերատեսչական և բազմաշերտ համակարգերի համադրումը:
Իր խոսքում Նաիրի Ադամյանը անդրադարձավ թվայնացման խնդիրներին, կիբեռանվտանգության հարցերին:
«Իմ ընկալմամբ՝ թվայնացումը ոչ թե ինքնանպատակ է, այլ միջոց, այն գործիք է կառավարումը, այդ թվում՝ պետական կառավարումը, դարձնելու առավել արդյունավետ, կանխատեսելի, հաշվետու և ավելի մարդակենտրոն»,- ասաց թեկնածուն:
Նրա խոսքով՝ թվային համակարգերը պետք է դիտարկել ոչ միայն որպես տեխնիկական նախագծեր, այլև որպես ծառայություններ մատուցող կառավարման գործիքներ, որոնց նպատակը քաղաքացու և բիզնեսի համար արժեքի ստեղծումն է:
«Հանձնաժողովը չեմ պատկերացնում որպես վերահսկող, պատժիչ մարմին, այն պետք է լինի համակարգային կայունության հենարան, մարմին, որը մի կողմից ապահովում է կանոնների պահպանումը, մյուս կողմից՝ հասկանում է համակարգի ներսի բարդությունները և նպաստում դրանց լուծմանը:
Կարևոր է հստակ տարբերակել, որ հանձնաժողովը կառավարման մարմին չէ, այն կարգավորող մարմին է, ինչը նշանակում է, որ հանձնաժողովը չի ղեկավարելու պետական տեղեկատվական համակարգեր, այն սահմանելու է խաղի կանոնները և հետևելու է դրանց պահպանմանը»,- ասաց թեկնածուն:
