Եվրամիությունը նախկինի պես մտադիր է մինչև 2026 թվականի վերջն ամբողջությամբ հրաժարվել ռուսական հեղուկացված բնական գազի (LNG) ներկրումից՝ չնայած էներգակիրների մատակարարման հետ կապված ճգնաժամին, որն առաջացել է Իրանի դեմ ԱՄՆ-ի և Իսրայելի պատերազմի պատճառով: Այդ մասին հայտարարել է Եվրահանձնաժողովի նախագահ Ուրսուլա ֆոն դեր Լայենը՝ ԵՄ գագաթնաժողովից հետո կայացած մամուլի ասուլիսում։
Հարցին, թե արդյոք ԵՄ-ն կհետաձգի Ռուսաստանից հեղուկացված բնական գազի ներկրումը դադարեցնելու վերջնաժամկետը՝ Կատարում արտադրական օբյեկտներին պատճառված վնասի և մատակարարումների գլոբալ խափանումների պատճառով, ԵՀ ղեկավարը պնդել է. «Մենք միջնաժամկետ ու երկարաժամկետ հեռանկարում ճիշտ ուղու վրա ենք, և մեր նպատակները շատ հստակ են»։
Ավելի վաղ՝ մարտի 18-ին, իրանական լրատվական գործակալությունները հաղորդել էին Իսրայելի կողմից Պարսից ծոցի ափին գտնվող Իսլամական Հանրապետության գազի արդյունաբերության օբյեկտների վրա հարձակումների մասին: Մասնավորապես, հարված է հասցվել աշխարհի խոշորագույն գազային հանքավայրին՝ Հարավային Պարսին, որը Թեհրանը կիսում է Կատարի հետ։
Դրանից հետո՝ մարտի 19-ի գիշերն էլ, Իրանն է բալիստիկ հրթիռներով հարված հասցրել Կատարի Ռաս Լաֆան արդյունաբերական գոտում գտնվող աշխարհի ամենամեծ նավթագազային համալիրներից մեկին։
