Վահան եպիսկոպոս Հովհաննիսյանը, ով այս օրերին բուժման նպատակով մեկնել է ԱՄՆ, կրկին հայտարարությամբ է հանդես եկել՝ խոսելով Եկեղեցի-պետություն առճակատման մասին։
Սրբազանը նշել է, որ Հայաստանի կառավարության և Մայր Աթոռ Սուրբ Էջմիածնի միջև անդունդը անընդհատ խորանում է։
«Անկախ մեր անհատական քաղաքական հայացքներից՝ իրականությունը դաժան է. շատ հավատացյալներ խորապես անհանգստացած են, մեր միասնությունը խարխլվել է, և մեր սիրելի Եկեղեցու նկատմամբ վստահությունը ճեղքվել է։ Այս ճգնաժամի հիմքում ես տեսնում եմ ոչ միայն ինստիտուտների միջև վեճ, այլև եկեղեցու կառավարման ներսում վստահության խորը ճգնաժամ։ Մեր ժողովրդի մի հատված այժմ զգում է, որ Մայր Աթոռի ղեկավարությունը հեռացել է սովորական հավատացյալներից՝ փոխարենը միանալով հարուստ և ազդեցիկ շրջանակներին։ Շատ որոշումներ կայացվում են փակ դռների հետևում, որ որոշ հոգևորականներ ավելի շատ են կլանված աշխարհիկ քաղաքականությամբ, քան աղոթքով և Սուրբ Գրքի ուսումնասիրությամբ ու ուսմունքով։ Ավելին, աճում է այն կարծիքը, որ եկեղեցական իշխանությունը ներքաշվել է քաղաքական պայքարների մեջ այնպես, որ վնասում է թե՛ Եկեղեցու հեղինակությանը, թե՛ մեր ազգի խաղաղությանը: Թեև կարելի է վիճել մանրամասների շուրջ, բայց սա անհերքելի է»,- ասել է Վահան Սրբազանը։
Նա նշել է, որ Նորին Սրբություն Գարեգին Բ Ամենայն հայոց կաթողիկոսը հովվել է Եկեղեցին խորապես դժվար տարիներին: Նրա պաշտոնավարման ընթացքում Սուրբ Էջմիածինը վերականգնվել և ամրապնդվել է։
«Այս կառավարումը արժանի է մեր անկեղծ ճանաչմանը և երախտագիտությանը: Այնուամենայնիվ, Եկեղեցին չի ապրում միայն աղյուսներով ու շաղախով: Այն շնչում է Հիսուս Քրիստոսի Ավետարանով, որը պահպանվում է ճշմարտությամբ, վստահությամբ, հոգևոր հայրությամբ և բարոյական պարզությամբ, որոնք մարմնավորված են մեր ժողովրդի սրբազան ավանդույթներում: Երբ այս հիմնարար սյուները թուլանում են, արտաքին կարգը չի կարող բուժել ավելի խորը հոգևոր վերքը:
Մենք պետք է նաև արդարությամբ խոսենք պետության մասին: Հայաստանի կառավարությունը ծանր մանդատ է կրում խաղաղության, հասարակական կարգի և մեր հայրենիքի անվտանգության համար վտանգավոր ժամանակներում: Այս մանդատ պետք է հարգվի»,- ընդգծել է Վահան Սրբազանը՝ միևնույն ժամանակ նշելով, որ Եկեղեցու բարենորոգումը պետք է բխի նրա օրինական և կանոնական ներքին կյանքից, սակայն այն չի կարող պահպանվել, եթե ստեղծվի տպավորություն, թե Եկեղեցին հարկադրվում է իր սրբազան կարգից դուրս գտնվող ուժերի կողմից։
Սրբազան Հայրը, ինչպես Պոլսո Հայոց պատրիարք Սահակ արքեպիսկոպոս Մաշալյանը, կողմ է, որ ստեղծվի սինոդական կառույց, գումարվի Ազգային եկեղեցական ժողով։
Նա նշել է, որ եթե Վեհափառ Հայրապետը օրհնի նման ուղու բացումը, այն չպետք է դիտարկվի որպես պարտություն կամ նվաստացում, այլ պետք է մեծարվի որպես խորը զոհաբերություն խաղաղության, միասնության և մեր Եկեղեցու բուժման համար:
«Հայ ժողովուրդը արժանի է մի Եկեղեցու, որը կհաստատի նրանց հավատքը, մի Եկեղեցի, որն առաջնորդվում է Ավետարանով և մեր նախնիների սրբազան ավանդույթներով, այլ ոչ թե քաղաքական հռետորաբանությամբ կամ քաղաքականացված հոգևորականության աշխարհիկ նկրտումներով: Մեր հոտը փնտրում է եկեղեցական վարչակազմ, որն առաջարկում է ճշմարտություն վախի փոխարեն, զղջում պաշտպանության փոխարեն և քաջություն լռության փոխարեն:
Թող Աստված իմաստություն, խոնարհություն և խաղաղություն շնորհի բոլոր նրանց, ովքեր պատասխանատվություն են կրում այս դժվարին ժամին»,- հավելել է Վահան Սրբազանը։
