ԱՄՆ-ն ժամանակավորապես մեղմացրել է ռուսական նավթի դեմ պատժամիջոցները
ԱՄՆ-ն մինչև ապրիլի 11-ը պատժամիջոցներից ազատել է մինչև մարտի 12-ը նավերում բեռնված ռուսական նավթի և նավթամթերքի վաճառքը։ Լիցենզիան, որը թույլ է տալիս կատարել համապատասխան գործարքներ, հրապարակվել է հինգշաբթի՝ մարտի 12-ին, երկրի ֆինանսների նախարարության կայքում:
Գերատեսչության նախարար Սքոթ Բեսենթի խոսքով՝ նախագահ Դոնալդ Թրամփն այդ որոշումը կայացրել է «համաշխարհային էներգետիկ շուկաների կայունությունն ապահովելու և ցածր գները պահպանելու համար»՝ Իրանի հետ ԱՄՆ-Իսրայել պատերազմի ֆոնին։ X սոցցանցի իր գրառման մեջ նախարարը նշել է, որ այդ «նեղ մասնագիտացված, կարճաժամկետ միջոցն «էական ֆինանսական օգուտ չի բերի Ռուսաստանի կառավարությանը»:
Fox News-ի տվյալներով՝ մարտի 12-ի դրությամբ, աշխարհի 30 վայրում լցանավերում պահվում է մոտ 124 միլիոն բարել ռուսական ծագման նավթ։ Հաշվի առնելով Իրանի կողմից շրջափակված Հորմուզի նեղուցում վառելիքի ամենօրյա կորուստները, դա կբավականացնի 5-6 օրվա մատակարարումների համար՝ պնդել է հեռուստաալիքը:
«Մեծ յոթնյակի» երկրները, սակայն, պայմանավորվել են չմեղմացնել Ռուսաստանի դեմ պատժամիջոցները՝ Մերձավոր Արևելքից նավթի մատակարարումների խափանման ֆոնին՝ Իրանի դեմ ԱՄՆ-ի և Իսրայելի սկսած պատերազմի պատճառով։ Այդ մասին հայտարարել է Ֆրանսիայի նախագահ Էմանուել Մակրոնը «Մեծ յոթնյակի» առաջնորդների տեսակոնֆերանսից հետո։
«Մենք որոշել ենք, որ իրավիճակը ոչ մի կերպ չի արդարացնում Ռուսաստանի դեմ գործող պատժամիջոցների չեղարկումը»,- ասել է Մակրոնը։
