ՀՀ վարչապետ Նիկոլ Փաշինյանը Կառավարության նիստից հետո լրագրողների հետ զրույցում հերքել է նախկին ՄԻՊ Արման Թաթոյանի հայտարարությունը, թե Գեղարքունիքի Կութ գյուղի ուղղությամբ ադրբեջանական զինված ուժերը նոր մարտական դիրք են տեղադրել ՀՀ տարածքում:
Ըստ վարչապետի՝ Թաթոյանի հայտարարությունը չի համապատասխանում իրականությանը։
«Կա հստակ քարտեզ, կա հստակ գիծ՝ դե յուրե նշանակություն ունեցող, ինչը ցույց է տալիս, որ այդ պնդումները չեն համապատասխանում իրականությանը»,- ասել է վարչապետն ու հարց հնչեցրել՝ «կարո՞ղ է պատերազմ կա, ես տեղյակ չեմ»։
Նա զարմանք է հայտնել նման տեղեկությունների շրջանառման կապակցությամբ:
«Կամ ինչ-որ կոնֆլիկտ կա, էսկալացիա կա, զոհեր ու վիրավորներ կան, ինձ չեք ասում, խնայո՞ւմ եք։ Որտե՞ղ պատերազմ կա, որտե՞ղ կա վիրավոր, որտե՞ղ կա կրակոց, որտե՞ղ կա զոհ, որտե՞ղ կա հարձակում, պայթյուն և այլն, լուսաբանեք, իմանանք՝ որտեղ կա այդ ամենը»,- հարց է ուղղել վարչապետը և հայտարարել՝ Հայաստանում խաղաղություն է։
Ըստ Փաշինյանի՝ ինքը անհետ կորածների հարազատների հետ տասնյակ անգամներով հանդիպել է, ու փորձը ցույց է տվել՝ պետք է հասկանալ, թե այդ հանդիպման արդյունքում ինչ խնդիրներ են ուզում լուծվեն։
«Երբեք որևէ հանդիպումից չեմ խուսափում, ես եմ դուրս գալիս փողոցներ, որ մարդկանց հանդիպեմ, ուղղակի հանդիպման նպատակը, արդյունավետությունն ու օրակարգը պետք է հստակ լինեն»,- հավելել է նա:
