Հայտնի է դարձել Արման Ծառուկյանի նոր մրցակիցը Բրազիլիայում կայանալիք «Hype» լիգայի մրցաշարում: Այս մասին տեղեկանում ենք armsport.am կայքից։
Ավելի վաղ հաղորդվում էր, որ Ծառուկյանը ռևանշ է անցկացնելու ամերիկացի ըմբիշ Ջորջիո Պուլասի հետ, որի դեմ մենամարտը «RAF» լիգայի մրցաշարում ավարտվել էր զանգվածային ծեծկռտուքով։ Հետագայում պարզ դարձավ, որ Պուլասը հրաժարվել է գրեփլինգի կանոններով մրցելույթից և պահանջել է երկրորդ գոտեմարտն անցկացնել ազատ ոճի ըմբշամարտի կանոններով:
Արդյունքում՝ կարճ ծանուցմամբ Ծառուկյանի դեմ մրցագորգ դուրս գալուն համաձայնել է UFC-ի նախկին մարտիկ Մուհամադ Մոկաևը։
Ծառուկյան — Մոկաև գոտեմարտը կկայանա մարտի 11-ին Ռիո դե Ժանեյրոյում՝ «Hype Brazil» մրցաշարի շրջանակում։ Մարտիկները կմրցեն 10 րոպե տևողությամբ գոտեմարտում՝ «submission only» գրեփլինգի կանոններով (հաղթանակը հնարավոր է գրանցել միայն ցավեցնող կամ խեղդող հնարքով, հակառակ դեպքում կարձանագրվի ոչ-ոքի):
