Գոռ Մալաքյանը հայտարարել է ֆուտբոլային կարիերան ավարտելու մասին
«Արարատ» ֆուտբոլային ակումբի ավագ, Հայաստանի հավաքի անդամ Գոռ Մալաքյանը կարիերան ավարտելու որոշում է կայացրել, փոխանցում է ակումբը:
31-ամյա ֆուտբոլիստը «Արարատի» կազմում էր հանդես գալիս 2021 թվականից: Մինչ այդ նա հանդես է եկել «Փյունիկում», «Ալաշկերտում», «Շիրակում», ուկրաինական «Ստալում» եւ «Արարատ-Արմենիայում», 18 հանդիպում անցկացրել է Հայաստանի ազգային հավաքականի կազմում:
«Սիրելի ֆուտբոլասերներ, ցանկանում եմ տեղեկացնել, որ որոշում եմ կայացրել ավարտել ֆուտբոլային կարիերաս, քանի որ նոր փուլ է սկսում իմ կյանքում՝ մարզչական գործունեության մեջ: Կարծում եմ, որ իմ որոշումը ճիշտ էր, քանի որ գիտակցաբար եմ եկել այս քայլին: Մաքուր և հանգիստ խղճով եմ հեռանում, որպես ֆուտբոլիստ, բայց վստահ ու համոզված եմ, որ մեծ հաղթանակները դեռ առջևում են»,- նշել է Գոռ Մալաքյանը:
«Արարատ» ֆուտբոլային ակումբը շնորհակալություն է հայտնում Գոռ Մալաքյանին նվիրվածության համար և մաղթում է հետագա հաջողություններ:
«Գոռ Մալաքյանի որոշումը մեզ համար անսպասելի էր, սակայն մենք հարգանքով ենք վերաբերվում այդ ընտրությանը և մաղթում ենք նրան հետագա հաջողություններ։ Գոռ Մալաքյանը «Արարատի» կազմում անցկացրել է չորս լիարժեք մրցաշրջան, այդ ընթացքում դրսևորելով բարձր պրոֆեսիոնալիզմ և անսասան նվիրվածություն՝ արժանի կերպով կրելով թիմի ավագի թևկապը»,- ասել է «Արարատի» գործադիր տնօրեն Տիգրան Ղարաբաղցյանը:
