Ուկրաինական ԱԹՍ-ները հարձակվել են ռուսական բանակի համար աշխատող ձեռնարկությունների վրա.

Կիրակի լույս երկուշաբթի գիշերն Ուկրաինայի զինված ուժերը անօդաչու սարքերով մի շարք հարվածներ են հասցրել Ռուսաստանի շրջաններին՝ թիրախավորելով պաշտպանական արդյունաբերության համար աշխատող ձեռնարկություններն ու ենթակառուցվածքները, հաղորդում է DW-ն։
Թիրախներից մեկը Նիժնի Նովգորոդի մարզում գտնվող Արզամասի գործիքաշինական գործարանն էր։ Այն արտադրում է սարքեր ավիացիոն և տիեզերական արդյունաբերության, ինչպես նաև քաղաքացիական նշանակության արտադրանքներ:
Մարզի նահանգապետ Գլեբ Նիկիտինի խոսքով՝ ձեռնարկության մի աշխատակից զոհվել է, երկուսը՝ վիրավորվել և տեղափոխվել հիվանդանոց։
Կիրակի գիշերն անօդաչու սարքերով հարձակման է ենթարկվել Սարատովի նավթավերամշակման գործարանը։ Ձեռնարկությունում տեղի են ունեցել պայթյուններ և հրդեհ: Ուկրաինայի զինված ուժերի գլխավոր շտաբի հայտարարության մեջ նշված է, որ այն «Ռուսաստանի վառելիքային ենթակառուցվածքների հիմնական օբյեկտներից մեկն է, որը օկուպացիոն ուժերին նավթամթերք է մատակարարում»։
Դրոններով հարձակման է ենթարկվել ևս մեկ նավթավերամշակման գործարան, այս անգամ Ուկրաինայից մոտ 2000 կիլոմետր հեռու գտնվող Կոմիի Հանրապետությունում։ Ուկրաինական ԶԼՄ-ները, հղում անելով ռազմական հետախուզության աղբյուրներին, տեղեկացրել են, որ դրոնները խոցել են նավթամթերքով բաքը և վնասել գազի վերամշակման կայանն ու գազային կոնդենսատը:
Ռուսաստանի պաշտպանության նախարարությունը հայտնել է, որ ՀՕՊ ուժերը գիշերը խոցել են ավելի քան 30 ուկրաինական անօդաչու թռչող սարք երկրի մի շարք մարզերում, որից 7-ը՝ Մոսկվայի ուղղությամբ:
Ուկրաինական դրոնների հարձակումների պատճառով Ռուսաստանի մի քանի օդանավակայաններում, մասնավորապես՝ Սարատովում, Վոլգոգրադում, Կալուգայում և Նիժնի Նովգորոդում, սահմանափակումներ են մտցվել ինքնաթիռների ժամանման և մեկնման նկատմամբ, հայտնել է Դաշնային օդային տրանսպորտի գործակալությունը։