Հոնկոնգում ձերբակալվել է 13 կասկածյալ՝ կապված բնակելի համալիրում բռնկված հրդեհի հետ
Հոնկոնգի իշխանությունները 13 մարդու են ձերբակալել չկանխամտածված սպանության կասկածանքով՝ կապված վերջերս բնակելի համալիրում տեղի ունեցած խոշոր հրդեհի հետ, երկուշաբթի հաղորդել են չինական ԶԼՄ-ները:
Տեղական իշխանությունները հայտնել են, որ միջադեպի նախաքննությունը շարունակվում է, և ենթադրում են, որ այդ գործով ձերբակալությունները կարող են շարունակվել:
Իշխանությունները նաև հայտարարել են, որ համալիրում հավաքված շինարարական ցանցի 20 նմուշից 7-ը չեն համապատասխանել հրակայունության չափանիշներին։ Նրանք կարծում են, որ այդ ցանցի բեկորները, զուգորդված դյուրավառ պոլիուրեթանային փրփուրի հետ, կարող էին հրդեհի արագ տարածման պատճառ դառնալ։
Հրդեհը տեղի է ունեցել նոյեմբերի 26-ին՝ Հոնկոնգի Wang Fuk Court բնակելի համալիրում: Այն խլել է առնվազն 146 մարդու կյանք, ևս 100-ը համարվում են անհայտ կորած։
