Գինի, տուրիզմ, մշակույթ․ մեկնարկում է EnoFest և EnoTalks Armenia փառատոնը
Օգոստոսի 15–17-ը Երևանում կմեկնարկի EnoFest Armenia 2025 գինու, զբոսաշրջության և մշակույթի բացօթյա փառատոնը։ Գլխավոր վայրն է Խաչքարերի պուրակը, որտեղ կգործեն գինու, գաստրո, ձեռագործի, տուրիզմի, ինչպես նաև երաժշտության և երեխաների գոտիներ։ Մուտքն ազատ է, գինու համտեսը հնարավոր է փառատոնի բաժակով։
Փառատոնը կմեկնարկի օգոստոսի 15-ին՝ բացման արարողությամբ, իսկ օգոստոսի 17-ին կանցկացվի ավանդական խաղողի օրհնության արարողություն։ Սպասվում է շուրջ 40 հազար այցելու, ինչպես նաև արտասահմանյան հյուրերի և արտադրողների մասնակցություն։
Նույն օրը, օգոստոսի 15-ին, Grand Hotel Yerevan-ում կանցկացվի EnoTalks Armenia մասնագիտական համաժողովը՝ «Roots & Routes» խորագրով, որը կհամախմբի գինու և զբոսաշրջության ոլորտի միջազգային ու տեղական մասնագետներին։
Փառատոնը կազմակերպում է Enotourism Council of Armenia-ն՝ նպատակ ունենալով զարգացնել գինու զբոսաշրջությունը և ներկայացնել հայկական գինու մշակույթը միջազգային հարթակներում։
