Ռիո դե Ժանեյրոյում հանցավոր խմբավորման դեմ իրականացվել է խոշոր ոստիկանական գործողություն
Ռիո դե Ժանեյրոյի հյուսիսային արվարձաններում «Կարմիր հրամանատարություն» խմբավորման դեմ ոստիկանական գործողության ընթացքում սպանվել է առնվազն 64 մարդ։
Քաղաքի հյուսիսային թաղամասերի հետնախորշերում «Կարմիր հրամանատարություն» նարկոկարտելի դեմ զինված գործողությունը տևել է 17 ժամ, որին մասնակցել են տարբեր ոստիկանական ստորաբաժանումներ՝ ուղղաթիռներով, իսկ հատուկ նշանակության ուժերը՝ զրահամեքենաներով։
Գրեթե 100 ձերբակալման օրդեր կատարելու գործողությանը մասնակցել է անվտանգության մոտ 2500 աշխատակից։ Համակարգված գործողությունը հանցավոր խմբավորման դեմ մեկ տարի տևած նախաքննության արդյունք է, հայտնել է ոստիկանությունը։
Պաշտոնական հաղորդագրությունների համաձայն՝ զոհվածների մեծ մասը խմբավորման անդամներ են։ Զոհվածների թվում են 4 քաղաքացիական և ռազմական ոստիկանության աշխատակիցներ, ևս 15 ոստիկան վիրավորվել է։
Ձերբակալվել է հանցավոր գործունեության համար կասկածվող 80 անձ, այդ թվում՝ կարտելի առաջնորդներից մեկը, առգրավվել է մոտ 100 միավոր հրազեն։ Տեղական լրատվամիջոցների համաձայն՝ խմբավորման ենթադրյալ անդամները հարձակմանն արձագանքել են հրաձգությամբ, Ռիո դե Ժանեյրոյի հյուսիսում ու հարավ-արևելքում ճանապարհներ փակելով, բարիկադներ հրկիզելով և անօդաչու թռչող սարքերից նռնակներ նետելով։ Շատերը փորձել են փախչել տարածքից։
