Ժամանակն է Հայաստանը դարձնել վայր, որտեղ ոչ միայն կոդ են գրում, այլև նախագծում, արտադրում և արտահանում. ԲՏԱ նախարար
Կարծում եմ՝ Հայաստանի տնտեսական զարգացման հաջորդ փուլում մենք պետք է բարձրանանք արժեքային շղթայում՝ ծառայությունների մատուցումից անցում կատարելով դեպի արտադրանքի սեփականություն, պատվիրված նախագծերից դեպի մտավոր սեփականության ստեղծում, պարզ կոդավորումից դեպի արտահանվող, բարձրարժեք արդյունաբերություն։ Այս մասին սոցցանցի իր էջում գրել է ԲՏԱ նախարար Մխիթար Հայրապետյանը:
«Այսօր բավարար չէ պարզապես արտահանել տաղանդը կամ գաղափարները։ Ժամանակն է Հայաստանը դարձնել այն վայրը, որտեղ ոչ միայն կոդ են գրում, այլև նախագծում, արտադրում և արտահանում են ամբողջական, մրցունակ արտադրանքներ։
Մենք արդեն ունենք ներշնչող հաջողության պատմություններ՝ ընկերություններ, որոնք ապացուցել են, որ Հայաստանում հնարավոր է ստեղծել համաշխարհային մակարդակի արտադրանք։ Այս օրինակներով ոչ միայն պետք է հպարտանանք, այլև դրանք պետք է ամրապնդեն մեր համոզմունքը, որ այս ՌԱԶՄԱՎԱՐԱԿԱՆ ՓՈՓՈԽՈՒԹՅՈՒՆԸ և՛ անհրաժեշտ է, և՛ իրագործելի»,- գրել է նա։
