ԼՂ-ից փախստականներին տրամադրվող օգնությունից կեղծիքի միջոցով օգտվելու դեպքով քրեական վարույթ է նախաձեռնվել․ «Մայր Հայաստանի» ավագանու անդամը կձերբակալվի՞
Հունիսի 13-ին Երևանի քաղաքապետ Տիգրան Ավինյանի հայրը՝ Արմեն Ավինյանը իր դեմ քաղաքացիական հայցի շրջանակներում դատական նիստի ժամանակ փաստաբանի միջոցով փոխանցել էր հայտարարություն, որի համաձայն ավագանու «Մայր Հայաստան» խմբակցության անդամ Գրիգոր Իսկանդարյանն ու իր կինը՝ Ռեբեկա Առաքելյանն ըստ էության լինելով բավականաչափ ապահովված, կեղծիքի միջոցով օգտվել էին Լեռնային Ղարաբաղից բռնի տեղահանվածներին հատկացվող օգնությունից։
Civic-am-ին հասած տեղեկությունների համաձայն՝ հիշյալ հայտարարության հետ կապված հարուցվել է քրեական գործ։ Միևնույն ժամանակ մեզ փոխանցեցին, որ առայժմ ոչ ոք չի հարցաքննվել։
Հիշեցնենք, որ ըստ Արմեն Ավինյանի հայտարարության՝ ավագանու «Մայր Հայաստան» խմբակցության անդամ Գրիգոր Իսկանդարյանն ու իր կինը՝ Ռեբեկա Առաքելյանը, բնակվելով Երևանում և համատեղ ունենալով կանխիկ 18.000.000 ՀՀ դրամ /համաձայն իրենց իսկ կողմից 19.11.2023 թվականին ներկայացված հայտարարագրերի/ չեն խորշել դիմել և ստանալ կարիք ունեցող բռնի տեղահանված անձանց համար նախատեսված օգնությունը, ընդ որում՝ երբեմն ամսեկան նույնիսկ 10.000 դրամ գումարի չափով, դրանով իսկ նվազեցնելով պետության հատկացրած այն գումարը, որով պետք է ապահովվեր իրական կարիք ունեցող անձանց գոյատևումը:
Ուսումնասիրելով բաց աղբյուրներում առկա տեղեկատվությունները՝ Արմեն Ավինյանի մոտ առաջացել էր ողջամիտ կասկածներ այն մասին, որ Ռեբեկա Առաքելյանը, նրա ծնողները և եղբայրներն մինչև 19.09.2023 թվականը բնակվել են Հայաստանի Հանրապետությունում և վերջինիս ընտանիքը հնարավոր է առհասարակ չպետք է լիներ օգնության ծրագրերի շահառու։Ավինյանը հույս էր հայտնել, որ իրավապահները կիրականացնեն քննություն։
