Գերմանիայի կանցլերը դեմ է «Եվրատեսիլից» Իսրայելի հեռացմանը
Գերմանիայի կանցլեր Ֆրիդրիխ Մերցը հայտարարել է, որ Իսրայելի հեռացումը «Եվրատեսիլ» երգի մրցույթից կլինի սկանդալ: «Այդ դեպքում Գերմանիան կհրաժարվի մասնակցությունից: Ամոթ է, որ նման բան նույնիսկ քննարկվում է: Իսրայելն այս համայնքի մի մասն է»,- ասել է նա ARD հեռուստաալիքին:
Ներկայումս թեժ բանավեճ է ծավալվել մրցույթի մասնակից երկրների և հեռարձակող հեռուստաընկերությունների միջև: Շվեյցարիայի և հյուրընկալող երկիր Ավստրիայի հեռուստառադիոհեռարձակողները պաշտպանել են Իսրայելի մասնակցությունը, մինչդեռ Իսպանիայի, Իռլանդիայի, Իսլանդիայի, Սլովենիայի և Նիդերլանդների հեռարձակողները սպառնացել են բոյկոտել «Եվրատեսիլ-2026»-ը Վիեննայում՝ Գազայի հատվածում Իսրայելի ռազմական գործողությունների պատճառով:
«Եվրատեսիլի» կազմակերպիչ Եվրոպական հեռարձակողների միությունը դեկտեմբերին իր գլխավոր ասամբլեայում պետք է որոշում կայացնի 2026 թվականի մրցույթին Իսրայելի մասնակցության վերաբերյալ:
Եվրոպական հեռարձակողների միությունը նախկինում ընդգծել է, որ մրցույթը համարում է քաղաքականապես չեզոք, և հայտարարել է, որ չի բացառի Իսրայելին:
