Եղիազար Վարդանյանը շնորհավորական ուղերձ է հղել Ճարտարապետության համաշխարհային օրվա առթիվ
Հայաստանի քաղաքաշինության կոմիտեի նախագահ Եղիազար Վարդանյանը շնորհավորական ուղերձ է հղել Ճարտարապետության համաշխարհային օրվա առթիվ։
«Սիրելի՛ ճարտարապետներ, հարգելի՛ գործընկերներ,
Ջերմորեն շնորհավորում եմ մասնագիտական տոնի՝ Ճարտարապետության համաշխարհային օրվա առթիվ:
Վերջին շաբաթները հագեցած էին ճարտարապետական ամենատարբեր նախաձեռնություններով, որոնք աշխուժացնում են մասնագիտական քննարկումները, հնարավորություն տալիս առօրյա աշխատանքային պարտականություններից հայացքն ուղղելու ճարտարապետության առաքելությանը։
Ճարտարապետը մշտապես երկընտրանքի առջև է՝ գործնական լուծումներն ու ժամանակի պահանջները ներդաշնակեցնելու գեղագիտական արժեքների և մշակութային ժառանգության հետ։ Ճիշտ համադրության արդյունքում ճարտարապետությունն աշխատանքից փոխակերպվում է գեղեցիկի կերտման արվեստի՝ ստեղծելով քաղաքաշինական միջավայրեր, բնակավայրերի դիմագծեր։
Այսօր, ավելի, քան երբևէ, ճարտարապետները պահանջված են ինչպես մասնավոր, այնպես էլ Հայաստանի Հանրապետության կառավարության կողմից իրականացվող ծրագրերի շրջանակում։ Քաղաքաշինության կոմիտեն ճարտարապետական թիմերի հետ համագործակցությամբ հաջողությամբ ավարտել է միկրոռեգիոնալ մակարդակի տարածական պլանավորման փաստաթղթերի մշակման հսկայածավալ աշխատանքը։ Հայաստանի բոլոր բնակավայրերն արդեն ունեն հաստատված գլխավոր հատակագծեր, գոտևորման նախագծեր՝ ըստ էության, զարգացման հեռանկարն արտացոլող «քաղաքաշինական անձնագրեր»։
Կարևորելով համայնքների կայուն և հավասարաչափ զարգացումը՝ գալիք տարիներին առաջնահերթ է լինելու Հայաստանի տարաբնակեցման նախագծի մշակումը։ Այս պատասխանատու և միջոլորտային հանձնառությունը կյանքի կոչելու համար, անշուշտ, անհրաժեշտ է նախևառաջ ճարտարապետ-քաղաքաշինարարների ներուժը։
Ճարտարապետների կարողությունների առավել լայն դրսևորման հնարավորություն են ստեղծում նաև կառավարության հեռանկարային խոշոր նախաձեռնությունները և ոլորտային տարբեր ուղղություններով ընթացող ու նախատեսված քաղաքաշինական ծրագրերը։
Թվային այս դարաշրջանում ճարտարապետությունն անխուսափելիորեն փոխակերպվում է։ Արդի տեխնոլոգիաների կիրառմամբ ճարտարապետների համար բացվում են նոր հորիզոններ՝ միջազգային փորձին համընթաց քայլելու և մրցունակ գաղափարներ առաջարկելու համար։ Քաղաքաշինության կոմիտեն ձեր աջակցությամբ և ակտիվ համագործակցությամբ ձգտելու է նպաստել մասնագիտական գործունեության համար բարենպաստ միջավայրի կայացմանը:
Սիրելի՛ գործընկերներ, մաղթում եմ, որ ձեր աշխատանքը շարունակ ուղեկցվի ստեղծագործական ոգեշնչմամբ, նորարար մոտեցումներով, հուսալի գործընկերությամբ և արժանի գնահատանքով»։
