ԱՄԷ-ում գտնվող ՀՀ քաղաքացիները կկարողանան անարգել երթևեկել ազգային վարորդական վկայականով
Աշխատանքային այցով Արաբական Միացյալ Էմիրություններում գտնվող Հայաստանի Հանրապետության ՆԳ նախարար Արփինե Սարգսյանի գլխավորած պատվիրակությանը սեպտեմբերի 30-ին ընդունել է էմիրությունների փոխվարչապետ-ներքին գործերի նախարար, գեներալ-լեյտենանտ շեյխ Սեֆ բին Զայեդ Ալ Նահյանը։
Ողջունելով Արփինե Սարգսյանին՝ շեյխ Սեֆ բին Զայեդ Ալ Նահյանը բարձր է գնահատել երկու պետությունների գործընկերային հարաբերություններն ու ընդգծել, որ առկա են երկու գերատեսչությունների միջև համագործակցությունն առավել սերտացնելու և զարգացնելու հեռանկարներ։
Հայաստանի ներքին գործերի նախարարը, շնորհակալություն հայտնելով ջերմ ընդունելության համար, ևս կարևորել է երկու պետությունների ներքին գործերի համակարգերի միջև գործընկերային հարաբերությունների ամրապնդման անհրաժեշտությունը։
Արփինե Սարգսյանն ընդգծել է Արաբական Միացյալ Էմիրությունների դերը այս տարվա հունիսին Հայաստանի և Ադրբեջանի միջև երկխոսության կարևոր հարթակ ապահովելու գործում և շնորհակալություն հայտնել։
Քննարկման առարկա են դարձել երկու երկրների ներքին գործերի նախարարությունների համագործակցության ընդլայմանը վերաբերող հարցեր։ Կողմերը պայմանավորվել են պատվիրակությունների փոխադարձ այցեր կազմակերպել և դրանց հիման վրա համագործակցության օրակարգ մշակել։
Հանդիպումը նշանավորվել է փոխըմբռնման հուշագրի ստորագրմամբ։
Փոխադարձության սկզբունքի վրա հիմնված հուշագիրը վերաբերում է երկու պետությունների ներքին գործերի նախարարության կողմից տրամադրվող վարորդական վկայականների փոխադարձ ճանաչմանը, այն է՝ ոչ բնակության նպատակով Արաբական Միացյալ Էմիրություններում գտնվող Հայաստանի քաղաքացիները կարող են իրենց ազգային վարորդական իրավունքի վկայականով անարգել երթևեկել այդ պետության տարածքում, իսկ բնակության նպատակով գտնվելու պարագայում՝ վարորդական վկայականի փոխանակման համար դիմող անձն ազատում է դրա հետ կապված տեսական և գործնական քննություններից:
Արփինե Սարգսյանն ու շեյխ Սեֆ բին Զայեդ Ալ Նահյանը առանձնահատուկ կարևորել են Հուշագիրը և ընդգծել, որ այն դրական քայլ է ներքին գործերի նախարարությունների համագործակցության ամրապնդման առումով և միտված է երկու պետությունների քաղաքացիներին ավելորդ անհարմարությունից ազատելուն։
