Երևանում նախկինում օտարված շուրջ 100 մանկապարտեզների փոխարեն կառուցվել են պարսպապատ շքեղ առանձնատներ. Գալջյան

Երևանի ավագանու անդամ Արմեն Գալջյանը իր ֆեյսբուքյան էջում անդրադարձել է ավագանու Քննող հանձնաժողովի այսօրվա նիստին։

«Այսօր տեղի ունեցավ Երևանի ավագանու Քննող հանձնաժողովի հերթական նիստը:

Նիստի ընթացքում արձանագրվեց՝

1. Եթե նախկինում հայտարարվել էր շուրջ 40 օտարված մանկապարտեզի մասին, ապա հանձնաժողովի ուսումնասիրության արդյունքում դրանց թիվը հասել է շուրջ 100-ի։

2. Օտարված մանկապարտեզների բազմաթիվ բակային հատվածներում կառուցվել են պարսպապատ շքեղ առանձնատներ:

3. Նոր-Նորք վարչական շրջանի մանկապարտեզների տարածքները կասկածելի ցածր արժեքներով վարձակալության են տրվել, ՀՀԿ, ՕԵԿ և ՀՅԴ կուսակցություններին մասնավորապես 2006-2007 թվականներին:

4. Երևանի քաղաքապետարանի ենթակայության գործող մարզադպրոցին պատկանող թենիսի 2 կորտերը՝ հյուրանոցային մեծ համալիր շոգեբաղնիք և մեծ բակային տարածքը, որոնք գտնվել են Հրազդանի կիրճում, (այժմ «Օրանժ» ակումբ) օտարվել է 2004 թվականին ընդամենը 20-25.000 ԱՄՆ դոլարով:

Ուսումնասիրությունները շարունակվում են…»,-գրել է նա։