ՀՖՖ-ն Հայաստան-Պորտուգալիա ֆուտբոլային խաղին ընդառաջ հաղորդագրություն է տարածել
Հայաստանի ֆուտբոլի ֆեդերացիան հաղորդագրություն է տարածել այսօր տեղի ունենալիք Հայաստան-Պորտուգալիա ֆուտբոլային խաղին ընդառաջ։
«Հարգելի՛ երկրպագուներ,
Հայաստան-Պորտուգալիա հանդիպմանն ընդառաջ տեղեկացնում ենք, որ «Հանրապետական» մարզադաշտի մուտքերի մոտ գործելու են ՀՖՖ տեղեկատվական հատուկ կետեր:
Եթե մարզադաշտ մուտք գործելիս տոմսի QR կոդը չաշխատի, ապա պետք է մոտենալ նշված տեղեկատվական կետեր:
Եթե պարզվի, որ տոմսը կեղծ է, և խարդախության զոհ եք դարձել, ապա պետք է դիմել ՆԳՆ ոստիկանություն՝ համապատասխան իրավական գործընթաց սկսելու համար:
Բոլոր երկրպագուներին հորդորում ենք մարզադաշտ այցելել 2 ժամ շուտ՝ հերթերից խուսափելու համար»,- ասված է հաղորդագրության մեջ։
Հիշեցնենք՝ Հայաստան-Պորտուգալիա հանդիպումը տեղի կունենա սեպտեմբերի 6-ին՝ ժամը 20։00-ին, Վազգեն Սարգսյանի անվան «Հանրապետական» մարզադաշտում։
