Հասմիկ Հակոբյանը Վազգեն Սաղաթելյանի դեմ հայց է ներկայացրել
ԱԺ «Քաղաքացիական պայմանագիր» խմբակցության պատգամավոր Հասմիկ Հակոբյանը «Ֆեյսբուք»-ի իր էջում տեղեկացրել է, որ շատերի խորհրդով որոշել է «Իմնեմնիմի» փոդքասթի համահեղինակ Վազգեն Սաղաթելյանի դեմ հայց ներկայացնել:
«Որոշել եմ հաղորդավար ներկայացող Վազգեն Սաղաթելյանի կողմից հնչեցված սուտ ու արատավորող տեղեկությունները չթողնել անպատասխան։
Դատարանն արդեն վարույթ է ընդունել հայցադիմումս՝ արժանապատվությունն ու բարի համբավն արատավորող տեղեկությունները հերքելուն պարտավորեցնելու, հրապարակայնորեն ներողություն խնդրելու, պատվին և արժանապատվությանը պատճառված վնասի հատուցման պահանջների մասին»,- գրել է Հակոբյանը:
Ավելի վաղ հայտնել էինք նաև, որ ԱԺ «Քաղաքացիական պայմանագիր» խմբակցության պատգամավոր, ՔՊ վարչության անդամ Արուսյակ Մանավազյանը ևս դատի է տվել «Իմնեմնիմի» փոդքասթի համահեղինակ Վազգեն Սաղաթելյանին՝ պահանջելով հերքում իր մասին AntFake.am կայքում հրապարակված մի տեսանյութի հետ կապված։
ԱԺ նախագահ Ալեն Սիմոնյանը ևս դատի է տվել «Իմնեմնիմի» փոդքասթի համահեղինակ Վազգեն Սաղաթելյանին:
