Պուտին-Ալիև հանդիպումը Պեկինում ավարտվել է միայն ձեռքսեղմումով. Պեսկով
Ռուսաստանի և Ադրբեջանի միջև վերջերս սրված լարվածության ֆոնին Պեկինում Երկրորդ համաշխարհային պատերազմի ավարտի 80-ամյակին նվիրված շքերթի ընթացքում Վլադիմիր Պուտինը և Իլհամ Ալիևը ողջունել են իրար միայն ձեռքսեղմումով: Երկու երկրի ղեկավարները չեն զրուցել, սեպտեմբերի 1-ին Շանհայի համագործակցության կազմակերպության գագաթնաժողովի շրջանակում նախագահներն առանձին հանդիպում ևս չեն անցկացրել:
Դմիտրի Պեսկովը լրագրողների հետ զրույցում հաստատել է, որ Պուտինը և Ալիևը չեն բանակցել: «Այս անգամ բովանդակալից որևէ շփում չի եղել»,- նշել է Կրեմլի խոսնակը:
Հուլիսին Ռուսաստանի նախագահի մամուլի քարտուղարը հայտարարել էր, որ Ռուսաստանի և Ադրբեջանի հարաբերություններում բարդ շրջան է։
«Իհարկե, կա ամուր հիմք, կա երկու երկրի շահերի համընկնում, փոխադարձ հարգանքի վրա հիմնված փոխշահավետ համագործակցություն։ Բայց երբեմն երկու երկրի հարաբերություններում բարդ ժամանակներ են լինում։ Այժմ այդ շրջաններից մեկն է»,- հայտարարել է Կրեմլի պաշտոնական ներկայացուցիչը։ Պեսկովը միաժամանակ հույս է հայտնել, որ Մոսկվայի և Բաքվի միջև հարաբերությունների այդ շրջանը կանցնի:
Ռուս-ադրբեջանական հարաբերությունների վատթարացման պատճառը ադրբեջանական Ազալ ավիաընկերության քաղաքացիական ինքնաթիռի կործանումն է, որը Բաքուն համարում է ռուսական կողմի սխալի հետևանք և Մոսկվայից սպասում իր համար ընդունելի արձագանքի, այնուհետև Ռուսաստանում գտնվող ադրբեջանցիների նկատմամբ բռնությունների կիրառումը:
