Հարավային Կովկասը կենսական նշանակություն ունի. Իրանի խորհրդարան
Իրանի խորհրդարանը դեմ է արտահայտվել Զանգեզուրի միջանցքին՝ նշելով, որ այն սպառնալիք է ներկայացնում անվտանգության համար։ Այս մասին հայտնել է «Tasnim» հրատարակությունը։
Իսլամական խորհրդատվական վեհաժողովի գործադիր խորհրդի անդամ Ահմադ Նադերին օրենսդիր մարմնի այսօրվա բաց նիստում ընթերցել է ավելի քան 150 պատգամավորի հայտարարությունը Հարավային Կովկասի տարածաշրջանի ռազմավարական նշանակության և Իրանի հյուսիս-արևմտյան սահմաններին ռիսկային ծրագրերին հակազդելու մասին:
«Ճանաչված սահմանները փոխելու, պարտադրված միջանցքներ ստեղծելու կամ Զանգեզուրի միջանցքի նման նախագծեր իրականացնելու ցանկացած գործողություն անհամատեղելի կլինի տարածաշրջանի երկրների շահերի հետ և կդառնա կոլեկտիվ անվտանգության համար ուղղակի սպառնալիք», - ասվում է Իրանի խորհրդարանի հայտարարության մեջ։
Հայտարարության մեջ ասվում է, որ Իրանը իրեն իրավունք է վերապահում անվտանգության և ազգային շահերի դեմ ոտնձգության դեպքում օգտագործել բոլոր քաղաքական, իրավական և օրինական հնարավորությունները:
«Հարավային Կովկասը կենսական նշանակություն ունի ոչ միայն անվտանգության ապահովման տեսանկյունից, այլև որպես կարևոր էներգետիկ, տարանցիկ և տնտեսական միջանցք Իրանի և տարածաշրջանի համար»,- ասվում է հայտարարության մեջ։
