ԼՂ-ից տեղահանվածների ուսման վարձի փոխհատուցման քաղաքականությունը կշարունակվի. Ժաննա Անդրեասյան
Վերջին շրջանում մեզ հաճախ են դիմում Ղարաբաղից տեղահանված ընտանիքներ՝ նշելով, որ պետությունը նախորդ տարի ունեցավ որոշում, այն է՝ ուսման վարձի փոխհատուցման համար կրթարթոշակ տրամադրվեց 1-ին կուրս ընդունվածներին:
Այս քաղաքականությունը կշարունակվի: Այդ մասին ասուլիսի ժամանակ ասաց ԿԳՄՍ նախարար Ժաննա Անդրեասյանը:
«Քաղաքականությունը կշարունակվի, այսինքն՝ բոլոր նրանք, ովքեր ընդունվել են առաջին կուրս բարձրագույն կրթության մակարդակում (մենք խոսում ենք 240 ուսանողի մասին՝ մեր տվյալներով), և նրանք, ովքեր ընդունվել են ՄԿՈՒ համակարգ (վճարովի ընդունվելու մասին է խոսքը), կստանան կրթաթոշակ ուսման վարձի փոխհատուցման համար»,- ասաց նախարարը՝ տեղեկացնելով, որ առաջիկայում կլինեն Կառավարության համապատասխան որոշումներ:
«Այսինքն՝ նրանք, ովքեր արդեն ընդունվել էին և ստանում էին, այս ծրագրի շահառու էին, իսկ նրանք, ովքեր նոր են ընդունվում, նրանց համար պետությունը նույնպես կկիրառի այս քաղաքականությունը նույն պայմաններով»,- պարզաբանեց նախարարը:
