Պուտինի հետ հանդիպումն անհրաժեշտ է «զգայուն հարցերի» լուծման համար. Զելենսկի
Ռուսաստանի հետ առաջնորդների մակարդակով հանդիպումն անհրաժեշտ է «զգայուն հարցերը» լուծելու համար, իր տելեգրամյան ալիքում գրել է Ուկրաինայի նախագահ Վոլոդիմիր Զելենսկին:
«Քննարկել ենք անվտանգության երաշխիքները։ Սա կարևորագույն հարց է՝ որպես պատերազմի ավարտի սկիզբ: Գնահատում ենք ԱՄՆ-ի կարևոր ազդանշանը՝ աջակցելու և դրա մի մասը լինելու պատրաստակամության մասին։ Այսօր մեծ ուշադրություն է դարձվել երեխաների վերադարձին, ռազմագերիների և քաղաքացիական անձանց ազատ արձակմանը, որոնց պահում է Ռուսաստանը։
Պայմանավորվել ենք աշխատել այդ ուղղությամբ»,- հավելել է Զելենսկին։
Վոլոդիմիր Զելենսկին «մեծ քայլ առաջ» է անվանել Թրամփի հայտարարությունն այն մասին, որ ԱՄՆ-ն պատրաստ է մասնակցել պատերազմից հետո Ուկրաինային անվտանգության երաշխիքներ տրամադրելուն:
Նա հավելել է, որ պատրաստ է Պուտինի հետ անձնական հանդիպման և չի պնդի հրադադարը՝ որպես խաղաղության շուրջ բանակցություններ վարելու պայման: Ինչ վերաբերում է «տարածքների հարցին», ապա, ինչպես Զելենսկին հայտարարել է Վաշինգտոնում, նման զգայուն հարցերը նա կքննարկի Պուտինի և Թրամփի հետ եռակողմ հանդիպման ժամանակ։
Ավելի վաղ տեղեկացրել էինք, որ ավարտվել են Թրամփի և Զելենսկու և եվրոպացի առաջնորդների հետ հանդիպումը։
ԱՄՆ պետքարտուղար Մարկո Ռուբիոն Fox News-ի եթերում ասել էր, որ ներկա է եղել Դոնալդ Թրամփի՝ Վլադիմիր Պուտինին ուղղված հեռախոսազանգին, որը տեղի է ունեցել Վաշինգտոնում Ուկրաինայի նախագահ Վոլոդիմիր Զելենսկու և եվրոպական առաջնորդների հետ ԱՄՆ առաջնորդի հանդիպման ժամանակ։
Նա ընդգծել էր, որ և՛ Ռուսաստանը, և՛ Ուկրաինան ստիպված կլինեն տարածքային զիջումների գնալ՝ խաղաղ համաձայնության հասնելու համար։
