Մերցը Թրամփ-Զելենսկի սպասվող բանակցությունների մասին

Գերմանիայի կանցլեր Ֆրիդրիխ Մերցը օգոստոսի 13-ին նախաձեռնել է Ուկրաինայի վերաբերյալ առցանց բանակցություններ՝ արևմտյան առաջնորդների, ինչպես նաև ԱՄՆ-ի և Ուկրաինայի նախագահներ Դոնալդ Թրամփի ու Վոլոդիմիր Զելենսկու մասնակցությամբ: Այս մասին հայտնում է DW-ն:
Ակնկալվում է, որ Մերցից, Թրամփից և Զելենսկուց բացի, զրույցին կմասնակցեն Մեծ Բրիտանիայի, Իտալիայի, Լեհաստանի, Ֆինլանդիայի և Ֆրանսիայի նախագահներն ու կառավարությունների ղեկավարները, ինչպես նաև Եվրահանձնաժողովի նախագահ Ուրսուլա ֆոն դեր Լայենը, ԵՄ խորհրդի նախագահ Անտոնիու Կոշտան, ՆԱՏՕ-ի գլխավոր քարտուղար Մարկ Ռյուտեն և ԱՄՆ փոխնախագահ Ջեյ Դի Վենսը:
«Բանակցություններում, ի թիվս այլ խնդիրների, կքննարկվեն Ռուսաստանի վրա ճնշում գործադրելու հետագա տարբերակները, հնարավոր խաղաղ բանակցությունների նախապատրաստումը և տարածքային պահանջների ու անվտանգության հետ կապված հարցերը»,- ասվում է Գերմանիայի կառավարության հայտարարության մեջ:
Մերցը այդ հանդիպումը կազմակերպում է օգոստոսի 15-ին ԱՄՆ Ալյասկա նահանգում նախատեսված Թրամփ-Պուտին բանակցություններից առաջ: Դա կլինի Պուտինի և Թրամփի առաջին հանդիպումը վերջինիս երկրորդ ժամկետով վերընտրվելուց հետո, գրում է DW-ն։