Նիկոլ Փաշինյան․ Վաշինգտոնի համաձայնագրերը բացում են խաղաղության և տնտեսական համագործակցության նոր էջ
Վաշինգտոնում Հայաստանի և Ադրբեջանի միջև ստորագրված փաստաթղթերի վերաբերյալ վարչապետ Նիկոլ Փաշինյանը հանդես է եկել ասուլիսով՝ հարցուպատասխանի ձևաչափով։
Փաշինյանը հիշեցրեց, որ Հայաստանը «Խաղաղության խաչմերուկ» նախագիծը ներկայացրել է բոլոր գործընկերներին՝ առաջարկելով ներդրումներ իրականացնել դրա շրջանակներում։ «Գործընկերներից մի մասն առնվազն նախնական հետաքրքրություն ցուցաբերել էին։ Բայց այդ ծրագրում ներդրումներ իրականացնելու ամերիկյան հետաքրքրությունը ակնհայտորեն տարբերվում էր», — ասաց նա։
Նրա խոսքով՝ համաձայնագրերը երկու երկրների համար նոր հնարավորություններ են ստեղծում։ «Հայաստանը ապաշրջափակվում է, Ադրբեջանն իր հերթին հնարավորություն է ստանում Հայաստանի տարածքով հուսալի կապ ունենալ Նախիջևանի հետ։ Հայաստանը հնարավորություն է ունենում Ադրբեջանի և Նախիջևանի տարածքով երկաթուղային կապ ունենալ Սյունիքի մարզի հետ։ Բացի այդ, մենք ստանում ենք հասանելիություն միջազգային երկաթուղային ցանցին դեպի Ռուսաստան, Իրան, Կենտրոնական Ասիա և Չինաստան», — նշեց վարչապետը։
Փաշինյանը ընդգծեց, որ այս պահին գոյություն ունեն միայն ստորագրված փաստաթղթերը, և այլ պայմանավորվածություն չկա։ «Հետագայում ինչպիսին էլ լինեն լուծումները, դրանք պետք է տեղավորվեն ինքնիշխանության, տարածքային ամբողջականության, իրավազորության սկզբունքների շրջանակում։ Եվ փոխադարձությունը պետք է աշխատի։ Այս փուլում մենք չենք մտել դետալների մեջ», — հավելեց նա։
Վարչապետը նաև շեշտեց, որ փոխադարձ տրանսպորտային ենթակառուցվածքների օգտագործումը կարող է դառնալ անվտանգության և կայունության կարևոր երաշխիք։ «Եթե Հայաստանի և Ադրբեջանի տասնյակ հազարավոր քաղաքացիներ օգտվեն միմյանց տրանսպորտային ենթակառուցվածքներից, սկսվի երկկողմ առևտուրը, դա կլինի խաղաղության ամենահուսալի երաշխիքներից մեկը», — ասաց Փաշինյանը։
