Թուրքիան կշարունակի բնական գազ գնել Ռուսաստանից՝ չնայած ԱՄՆ-ի կոչերին․ Բայրաքթար
Թուրքիան կշարունակի բնական գազ գնել Ռուսաստանից՝ չնայած Վաշինգտոնի կոչերին՝ հայտարարել է այդ երկրի էներգետիկայի նախարար Ալփարսլան Բայրաքթարը։
«Մենք համաձայնագրեր ունենք Մոսկվայի հետ։ Ձմեռային սեզոնը մոտենում է։ Չենք կարող մեր քաղաքացիներին ասել, որ գազ չկա։ Մենք պետք է գազ ստանանք Ռուսաստանից, Ադրբեջանից և Թուրքմենստանից»,- նշել է նախարարը՝ հավելելով, որ Թուրքիան էներգառեսուրսներ է ներմուծում՝ հաշվի առնելով սեփական կարիքները։
Բայրաքթարը նաև հայտարարել է, որ Ռուսաստանի հետ բանակցություններ են վարում՝ «Կապույտ հոսք» խողովակաշարով Թուրքիա բնական գազի մատակարարման համաձայնագիրը երկարաձգելու մասին։
Ավելի վաղ Սպիտակ տանը Ռեջեփ Էրդողանի հետ հանդիպմանը Դոնալդ Թրամփը կոչ էր արել Անկարային դադարեցնել ռուսական էներգակիրների գնումը և այդպիսով չնպաստել ռուս-ուկրաինական պատերազմի շարունակմանը: Էրդողանը նշել է, որ Թուրքիան ընտրում է էներգետիկ աղբյուրների դիվերսիֆիկացման քաղաքականությունը:
