Ըստ Forbes-ի` Իլոն Մասկը դարձել է պատմության մեջ առաջին մարդը, ում կարողությունը հասել է 500 միլիարդ դոլարի
Իլոն Մասկը դարձել է պատմության մեջ առաջին մարդը, ում կարողությունը հասել է 500 միլիարդ դոլարի: Տարեսկզբին, երբ Մասկը աշխատում էր Դոնալդ Թրամփի վարչակազմում, նրա ընկերությունների, մասնավորապես Tesla-ի բաժնետոմսերի գինը նվազել էր: Սակայն Սպիտակ տնից հեռանալուց հետո նրա ընկերությունների բաժնետոմսերի արժեքը կրկին աճել է:
Forbes ամսագրի հաշվարկներով՝ չորեքշաբթի օրը բորսայական առևտրի ընթացքում Մասկի ակտիվների ընդհանուր արժեքը կարճ ժամանակով գերազանցել է 500 միլիարդ դոլարը, այնուհետև փոքր-ինչ նվազել է՝ հասնելով մոտ 499 միլիարդ դոլարի:
Ներկայումս Մասկը աշխարհի ամենահարուստ մարդու կոչման համար պայքարում զգալի առաջ է իր մրցակիցներից: Երկրորդ տեղում գտնվող Oracle-ի հիմնադիր Լարի Էլիսոնի կարողությունը կազմում է մոտ 350 միլիարդ դոլար:
Սեպտեմբերին Էլիսոնը կարճ ժամանակով առաջ էր անցել Մասկից, երբ Oracle-ի բաժնետոմսերի գինը բարձրացել էր ավելի քան 40%-ով՝ կապված ընկերության երկու ուղղությունների՝ ամպային ենթակառուցվածքների և արհեստական բանականության վերաբերյալ դրական կանխատեսումների հետ:
Այնուամենայնիվ, Մասկի ընկերությունների բաժնետոմսերի գնի աճը նրան կրկին վերադարձրել է առաջին հորիզոնական:
