Մադագասկարի նախագահը ցույցերի ֆոնին հայտարարել է կառավարությունը ցրելու մասին
Մադագասկարի նախագահը հայտարարել է կառավարությունը ցրելու մասին: ԶԼՄ-ների տվյալով՝ դա տեղի է ունեցել երկրում ջրի և էլեկտրաէներգիայի պակասի պատճառով սկսված ցույցերի ֆոնին:
«Ընդունում ենք և ներողություն խնդրում, եթե կառավարությանը չի հաջողվել կատարել իր պարտականությունները»,- նշել է նախագահը: Նրա խոսքով՝ երիտասարդների հետ երկխոսության պայմաններ կստեղծեն և կաջակցեն ցույցերի ընթացքում տուժած ընկերություններին:
Անտանանարիվուում և այլ բնակավայրերում ցույցերը շարունակվում են արդեն 6 օր։ Ակցիայի մասնակիցները բողոքել են էլեկտրաէներգիայի հաճախակի անջատումների և ջրի պակասի դեմ։ Ցուցարարների և իրավապահ մարմինների միջև բախումներ են եղել, տեղեկություններ կան, որ արցունքաբեր գազ և մարտական փամփուշտներ են կիրառվել, կան ձերբակալվածներ:
ՄԱԿ մարդու իրավունքների գերագույն հանձնակատարը հայտարարել է, որ ակցիայի ժամանակ առնվազն 22 մարդ է զոհվել, 100-ը՝ վիրավորվել։ Մադագասկարի ԱԳՆ-ն հերքել է այդ տեղեկությունը:
