Ռյուտեն թույլատրելի է համարել անհրաժեշտության դեպքում ռուսական ռազմական ինքնաթիռներ խոցելը ՆԱՏՕ-ի օդային տարածքում

ՆԱՏՕ-ի գլխավոր քարտուղար Մարկ Ռյուտեն աջակցել է ԱՄՆ նախագահ Դոնալդ Թրամփի առաջարկին՝ դաշինքի օդային տարածքում ռուսական ռազմական ինքնաթիռներ խոցելու վերաբերյալ, սակայն պարզաբանել է, որ նման գործողությունները թույլատրելի են միայն իսկապես անհրաժեշտության դեպքում։

Սեպտեմբերի 23-ին Թրամփը աջակցել է ՆԱՏՕ-ի երկրներին՝ ռուսական ռազմական ինքնաթիռները խոցելու հարցում, եթե դրանք թռչեն դաշինքի օդային տարածքում։ Լրագրողի հարցին, թե արդյոք ԱՄՆ-ն պատրաստ կլինի՞ օգնել իր դաշնակիցներին նման իրավիճակներում, Թրամփը պատասխանել է. «Կախված է հանգամանքներից»։

Միաժամանակ Լեհաստանի նախագահ Կարոլ Նավրոցկին հայտարարել է, որ Լեհաստանը կխոցի իր օդային տարածքը միտումնավոր մտած ռազմական ինքնաթիռները։

Նա նշել է, որ ՆԱՏՕ-ի ու Միացյալ Նահանգների աջակցությամբ Լեհաստանը պատրաստ է արձագանքել ցանկացած սադրանքի՝ լեհ զինվորների ուժով։

«Մենք ունենք ավելի քան 200 000 լեհ զինվոր, հզոր բանակ և մեր դաշնակիցների, այդ թվում՝ Միացյալ Նահանգների, ամուր աջակցությունը։ Մենք ՆԱՏՕ-ի անդամ պետություն ենք և չենք հանդուրժի ռուսական անօդաչու թռչող սարքերի առկայությունը մեր օդային տարածքում»,- ասել է նա։