Ֆրանսուազ Ժակոբը հայտարարել է, որ Հարավային Կովկասում օդի ամենավատ որակը ՀՀ մայրաքաղաք Երևանում է
ՄԱԿ-ի մշտական համակարգողը Հայաստանում՝ Ֆրանսուազ Ժակոբը, հայտարարել է, որ Հարավային Կովկասում օդի ամենավատ որակը Հայաստանի մայրաքաղաք Երևանում է։ Այս մասին նա հայտնել է սեպտեմբերի 23-ին տեղի ունեցած «Բանկային գործի ապագան. կայուն նորարարություններ և հեռանկարներ» համաժողովի ժամանակ։
Ժակոբը նշել է, որ դա ազդում է Հայաստանի ընդհանուր գրավչության վրա։ Նա նաև ուշադրություն է հրավիրել երկրի տարածքում անապատացման և գյուղատնտեսական, շինարարական և լեռնահանքային գործունեության հետևանքով գետերի աղտոտման խնդիրների վրա։ Նրա խոսքով՝ ներկայումս Հայաստանը շրջակա միջավայրի պահպանությանը տրամադրում է իր ՀՆԱ-ի ընդամենը 0,6%-ը։
Սակայն ՄԱԿ-ի ներկայացուցիչը հավելել է, որ Հայաստանը առաջընթաց է գրանցում իր խաղաղության օրակարգի իրականացման գործում, ինչը նոր հնարավորություններ է ստեղծում։ Ժակոբը պարզաբանել է, որ այդ առաջընթացը հիմք է ստեղծում կանաչ տնտեսության զարգացման համար, այդ թվում՝ Կենսաբանական բազմազանության մասին կոնվենցիայի կողմերի համաժողովի 17-րդ նստաշրջանի (COP-17) շրջանակներում, որը տեղի կունենա Հայաստանում հաջորդ տարի։
