Իտալիան պատրաստ է ճանաչել Պաղեստինը երկու պայմանով. Մելոնի
Իտալիան կարող է ճանաչել Պաղեստինը որպես պետություն, եթե կատարվի երկու պայման՝ իսրայելցի բոլոր պատանդների ազատ արձակումը և Միացյալ Նահանգների ու Եվրամիության կողմից ահաբեկչական ճանաչված ՀԱՄԱՍ-ի ներկայացուցիչների հեռացումը իշխանության ցանկացած դիրքից։ Այդ մասին հայտարարել է Իտալիայի վարչապետ Ջորջիա Մելոնին՝ Նյու Յորքում ՄԱԿ-ի Գլխավոր ասամբլեայի շրջանակում լրագրողների հետ զրույցում։
Ըստ Մելոնիի, որի խոսքը մեջբերել է իտալական ANSA լրատվական գործակալությունը, քաղաքական ճնշումը պետք է կիրառվի հիմնականում ՀԱՄԱՍ-ի, այլ ոչ թե Իսրայելի վրա, քանի որ ՀԱՄԱՍ-ն է սկսել պատերազմը և խոչընդոտում է դրա ավարտը՝ հրաժարվելով ազատ արձակել պատանդներին։
ՄԱԿ-ի Գլխավոր ասամբլեայի 80-րդ նստաշրջանի նախօրեին մի շարք երկրներ, այդ թվում՝ Մեծ Բրիտանիան, Ավստրալիան, Կանադան, Պորտուգալիան, Ֆրանսիան և Բելգիան, հայտարարել են Պաղեստին պետության ճանաչման մասին։ Ընդհանուր առմամբ, Պաղեստինը որպես պետություն ճանաչել են ՄԱԿ-ի 193 անդամ պետություններից ավելի քան 150-ը։
Միացյալ Նահանգները, ինչպես նաև Իսրայելը, կտրականապես դեմ են ճանաչմանը։
