Եվրահանձնաժողովը Google-ին տուգանել է 2.95 միլիարդ եվրոյով
Եվրոպական հանձնաժողովը (ԵՀ) ամերիկյան Google կորպորացիային 2.95 միլիարդ եվրո տուգանք է նշանակել՝ առցանց գովազդի ոլորտում մրցակցային կանոնները խախտելու համար: Բրյուսելի տվյալներով՝ ընկերությունը տարիներ շարունակ, սկսած 2014 թվականից, իր ծառայություններն օգտագործել է ի վնաս մրցակիցների, ինչը Եվրոպական Միության գործունեության մասին պայմանագրի 102-րդ հոդվածի խախտում է:
Հետաքննությունը պարզել է, որ Google-ը առավելություն է տվել սեփական արտադրանքին՝ շուկայում գերիշխող դիրք զբաղեցնելով: Եվրոպական հանձնաժողովը նաև նշել է կորպորացիայի բիզնես մոդելում շահերի բախման մասին. Google-ը միաժամանակ տեղադրում է գովազդներ, հանդես է գալիս որպես միջնորդ գովազդատուների և առցանց հարթակների սեփականատերերի միջև, ինչպես նաև կառավարում է սեփական գովազդային շուկան: Բրյուսելը պահանջել է, որ ընկերությունը դադարեցնի ինքնասպասարկման գործելակերպը:
Կորպորացիային 60 օր ժամանակ է տրվել՝ Եվրահանձնաժողովին ներկայացնելու պահանջներին համապատասխանող բիզնես մոդելը:
