Դոնալդ Թրամփը կոչ է արել ՀԱՄԱՍ-ին՝ ազատ արձակել բոլոր գերիներին
Դոնալդ Թրամփը կոչ է արել ՀԱՄԱՍ-ին՝ ազատ արձակել բոլոր գերիներին: Նա խոստացել է, որ այդ դեպքում ամեն ինչ կավարտվի:
Պաղեստինյան շարժումը հայտարարել է, որ պատրաստ է գործարքի՝ կվերադարձնի գերիներին. փոխարենը ակնկալում է, որ իսրայելական կողմն էլ կազատի բանտերում պահվող պաղեստինցիներին:
«Ռազմական գործողությունները պետք է դադարեցնել, իսկ ՑԱՀԱԼ-ը դուրս գա Գազայից: Նաև պատրաստ ենք ստեղծել ազգային անկախ վարչակազմ, որը կղեկավարի Գազայի հատվածը»,- ասված է ՀԱՄԱՍ-ի հաղորդագրության մեջ:
Իսրայելը քարոզչական խաղ է որակել շարժման հայտարարությունը: Բենիամին Նեթանյահուի աշխատակազմից կրկնել են՝ պատերազմի դադարեցման համար անհրաժեշտ է, որ պատանդները վերադարձվեն, ՀԱՄԱՍ-ը զինաթափվի, Գազայի հատվածն ապառազմականացվի, տարածաշրջանում անվտանգության վերահսկողությունը փոխանցվի Իսրայելին, և ստեղծվի քաղաքացիական այլընտրանքային կառավարություն, որը չի սպառնա Իսրայելին:
Այս ֆոնին Իսրայելում ցույցերը շարունակվում են: Ակցիայի մասնակիցները պահանջում են Նեթանյահուից գործարք կնքել, դադարեցնել պատերազմը և վերադարձնել գերիներին:
