Հայաստանն ու Ադրբեջանը մեծ մասամբ հաղթահարել են խաղաղության ճանապարհին առկա խոչընդոտները. Էրդողան
Ադրբեջանի և Հայաստանի միջև խաղաղության համաձայնագիրը կնպաստի սահմանային անցակետերի բացմանը և նոր ճանապարհների ու երկաթուղիների գործարկմանը՝ հայտարարել է Թուրքիայի նախագահը:
«Ես հավատում եմ, որ Հարավային Կովկասը կհասնի այն խաղաղությանը, որին ձգտում է: Սպիտակ տանը ստորագրություններն, անկասկած, արագացրին Հայաստան-Ադրբեջան կարգավորման գործընթացը։ Ադրբեջանն ու Հայաստանը մեծ մասամբ հաղթահարել են խաղաղության ճանապարհին առկա խոչընդոտները և հասել վերջնափուլին»,- ասել է Ռեջեփ Էրդողանը: Նրա համոզմամբ՝ տարածաշրջանային երկրները նույնպես կշահեն համագործակցության նոր հնարավորություններից։ Էրդողանի խոսքով՝ Ռուսաստանը և Իրանը ապագայում նույնպես կհասկանան, որ իրենց մտահոգություններն անտեղի էին:
Թուրքիայի նախագահն անդրադարձել է նաև ռուս-ուկրաինական հակամարտությանը: Նրա կարծիքով՝ Ռուսաստանի և Ուկրաինայի նախագահները դեռևս պատրաստ չեն հանդիպման:
Ռեջեփ Էրդողանը Վլադիմիր Պուտինի և Վոլոդիմիր Զելենսկու մոտեցումները դրական է գնահատել, սակայն կարծիք է հայտնել, որ հարկավոր է բարձրացնել բանակցությունների մակարդակը: Էրդողանի խոսքով՝ կոնկրետ արդյունքների հասնելու համար պետք է հանդիպում կազմակերպվի երկու ղեկավարների միջև: Նա հերթական անգամ առաջարկել է Թուրքիայի միջնորդությունը:
