Անհրաժեշտ է համաշխարհային ճնշում, որպեսզի Ռուսաստանը պատրաստ լինի իրական քայլեր ձեռնարկել խաղաղության ուղղությամբ. Երմակ
Ուկրաինայի նախագահի գրասենյակի ղեկավար Անդրեյ Երմակն ու փոխարտգործնախարար Սերգեյ Կիսլիցան Նյու Յորքում հանդիպում են ունեցել ԱՄՆ նախագահի հատուկ բանագնաց Սթիվ Ուիթքոֆի հետ։
Այդ մասին Երմակը գրել է «Տելեգրամ»-ի իր ալիքում։
«Ամենակարևորն իրական դիվանագիտությամբ Վաշինգտոնի գագաթնաժողովի բոլոր պայմանավորվածությունների իրականացումն առաջ մղելն է:
Հանդիպման սկզբում ես Ուիթքոֆին տեղեկացրի այն ռազմական հանցագործությունների մասին, որոնք Ռուսաստանն ամեն օր կատարում է Ուկրաինայի դեմ։ Մասնավորապես, Կիևի վրա հրթիռային և անօդաչու թռչող սարքերի զանգվածային հարձակման մասին խոսեցի, որը խլեց 23 մարդու կյանք, այդ թվում՝ չորս երեխայի։
Դժբախտաբար, Ռուսաստանը չի ձեռնարկում պատերազմը դադարեցնելու համար անհրաժեշտ ոչինչ և ակնհայտորեն երկարաձգում է մարտական գործողությունները։ Ուկրաինան աջակցում է նախագահ Թրամփի և բոլոր գործընկերների վճռականությանը՝ հնարավորինս շուտ երկարատև խաղաղության հասնելու համար»,- գրել է նա։
Ըստ Երմակի, հենց Ուկրաինան է դրական ընկալում Միացյալ Նահանգների խաղաղության առաջարկները։ Դրանք, սակայն, խոչընդոտվում են ռուսական կողմից։
«Մենք բաց ենք ղեկավարության մակարդակով ուղիղ բանակցությունների համար և պատրաստ ենք քննարկել հարցերի ամենալայն շրջանակը։ Մենք կարծում ենք, որ անհրաժեշտ է համաշխարհային ճնշում, որպեսզի Ռուսաստանը պատրաստ լինի իրական քայլեր ձեռնարկելու խաղաղության ուղղությամբ, այդ թվում՝ ղեկավարության մակարդակով անցկացնել կարևորագույն հանդիպումներ խաղաղության հաստատման համար»,- գրել է Երմակը։
Ուկրաինայի նախագահի գրասենյակի ղեկավարը նաև տեղեկացրել է, որ ԱՄՆ նախագահի հատուկ բանագնացին մոտ ապագայում հրավիրել է Ուկրաինա։
